11, სექტემბერი 2020 19:41:00
ბავშვებისთვის განკუთვნილი 200-ლარიანი დახმარების ჩარიცხვა უკვე დაწყებულია. თუმცა, მშობელთა ნაწილი აღნიშნავს, რომ ოჯახიდან მხოლოდ ერთ ბავშვს ჩაერიცხა თანხა, მეორე ან მომდევნო ბავშვზე კვლავ ელოდებიან. კითხვა მათაც აქვთ, ვინც პირველ სექტემბრამდე შეავსეს განცხადება და ამ დრომდე არ ჩაერიცხათ ფული. კითხვით საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მივმართეთ:
"ყველა ბავშვს დაერიცხება კუთვნილი თანხა, უბრალოდ სიის ან გვარების მიხედვით კი არა, შემთხვევითობის პრინციპით ხდება ჩარიცხვა. ძალიან ბევრი ბავშვი დარეგისტრირდა და ეტაპობრივად ჩაერიცხება ყველას. ჯანდაცვის სამინისტრომ თანხა მთლიანად გადაურიცხა ბანკებს.ეს მათზეა დამოკიდებული, ვის როგორ ჩაურიცხავს, ისე არავინ დარჩება. " - გვითხრეს სამინისტროში.
საქართველოს ბანკში გვითხრეს, რომ თანხის ჩარიცხვა აქტიურ რეჟიმშია დაწყებული და ეტაპობრივად ყველას ჩაერიცხება. პროცესი კვლავ გრძელდება. თიბისი ბანკში კი განაცხადეს, რომ ბანკის ყველა დარეგისტრირებულ მომხმარებელს თანხა უკვე ჩაერიცხა და პროცესი კვლავ გაგრძელდება. ლიბერთი ბანკში აღნიშნეს, რომ თანხის უმეტესი ნაწილი, რაც სამინისტროსგან ჩაერიცხათ, უკვე გადანაწილებულია ანგარიშებზე და რაც დარჩა, დღეს ჩაერიცხებათ ბანკის მომხმარებლებს.
წყარო: mshoblebi.ge