30, სექტემბერი 2020 13:58:00
ხელვაჩაურის მერიამ იჯარით გადასცა ფართობი ორგანიზაციას, რომელიც ტელევიზიის გახსნას გეგმავს, თუმცა უწყებამ ამ ეტაპზე კონკრეტული არაფერი იცის. დამფუძნებელმა ჩვენთან სატელეფონო საუბარში მაუწყებლის შემქნის ვერც იდეა და ვერც მიზანი დაგვისახელა.
„TV25.GE“-ს ლარისა მახარაძემ არც იმის შესახებ მიაწოდა ინფორმაცია, ვინ დააფინასნსებს ახალ მედიასაშუალებას ან რატომ აიღო ფართობი ქირით საჯარო უწყებისგან, მაშინ, როცა მუნიციპალიტეტში კომერციული სივრცეების სიმცირე არ არის.
ერთადერთი რაც გავიგეთ, არის ის, რომ ტელევიზია „TV მთვარე 2020“ მაუწყებლობას ინტერნეტის საშუალებით განახორციელებს.
ორგანიზაციის დამფუძნებელმა არც ის იცის, თუ რამდენი ადამიანის დასაქმებას გეგმავს და რა ფორმატისა და შინაარსის იქნება მაუწყებელი.
ფართობის იჯარით გადაცემის საკითხი დღეს საკრებულოს სხდომაზე გაიტანეს. ქონების მართვის განყოფილების ხელმძღვანელმა ანა ბაჟაშვილმა ჩვენს დამატებით კითხვებს არ უპასუხა.
განაცხადი ფართობის მოთხოვნის შესახებ საკრებულოს აპარატში რუსუდან ხოზრევანიძის სახელით დარეგისტრირდა. ჩვენ ხოზრევანიძეს დავუკავშირდით, რომელმაც შეკითხვებზე ზედაპირული პასუხები გასცა. დაკონკრეტებისგან თავი შეიკავა, მხოლოდ ის გვითხრა, რომ ორგანიზაცია დატოვა და მუნიციპალიტეტის მერს სთხოვა დოკუმენტებში აღარ ფიქსირდებოდეს.
„TV 25“-ის ინფორმაციით, ლარისა მახარაძე ხელვაჩაურის მერიის პრესსამსახურის თანამშრომლის ბადრი შუშანიძის ცოლია. ჩვენ დავუკავშირდით უწყების თანამშრომელს, რომელმაც გვითხრა, რომ ახალი ტელევიზიის შექმნასთან მას არანაირი კავშირი აქვს და ტელეკომპანიას ცოლი საკუთარი ხარჯებით აკეთებს.