30, სექტემბერი 2020 17:16:00
ხელვაჩაურის მერიამ იჯარით გადასცა ფართი ორგანიზაციას, რომელიც ტელევიზიის გახსნას გეგმავს, თუმცა უწყებამ ამ ეტაპზე კონკრეტული არაფერი იცის. დამფუძნებელმა ჩვენთან სატელეფონო საუბარში მაუწყებლის შემქნის ვერც იდეა და ვერც მიზანი დაგვისახელა. „მაცნეს“ ლარისა მახარაძემ არც იმის შესახებ მიაწოდა ინფორმაცია, ვინ დააფინანსებს ახალ მედიასაშუალებას ან რატომ აიღო ფართობი ქირით საჯარო უწყებისგან, მაშინ, როცა მუნიციპალიტეტში კომერციული სივრცეების სიმცირე არ არის. ერთადერთი რაც გავიგეთ, არის ის, რომ ტელევიზია „TV მთვარე 2020“ მაუწყებლობას ინტერნეტის საშუალებით განახორციელებს. ორგანიზაციის დამფუძნებელმა არც ის იცის, თუ რამდენი ადამიანის დასაქმებას გეგმავს და რა ფორმატისა და შინაარსის იქნება მაუწყებელი. ფართობის იჯარით გადაცემის საკითხი დღეს საკრებულოს სხდომაზე გაიტანეს. ინიციატორი ქონების მართვის განყოფილების ხელმძღვანელი ანა ბაჟაშვილია, რომელმაც ჩვენს დამატებით კითხვებს არ უპასუხა. „TV 25“-ის ინფორმაციით, ლარისა მახარაძე ხელვაჩაურის მერიის პრესსამსახურის თანამშრომლის ბადრი შუშანიძის ცოლია. ჩვენ დავუკავშირდით უწყების თანამშრომელს, რომელმაც გვითხრა, რომ ახალი ტელევიზიის შექმნასთან მას არანაირი კავშირი არ აქვს.