31, ოქტომბერი 2020 12:01:00
დედაქალაქის მერმა, ხმა საბურთალოს ოლქში, 64-ე საარჩევნო უბანზე მისცა. კახა კალაძის განცხადებით, „ქართულ ოცნებას“ არჩევნებში გამარჯვების მოლოდინი აქვს. როგორც განმარტა მმართველი პარტია ყველა ოლქში შეძლებს გამარჯვების მოპოვებას და მეორე ტურის საჭიროება დღის წესრიგში არ იქნება.
„არჩევანი გავაკეთე წარმატებულ საქართველოზე, მშვიდობაზე, სტაბილურობასა და განვითარებაზე. ჩვენ ძალიან ბევრი შეხვედრა გავმართეთ ყველა რაიონში, ყველა ქალაქში ვიმყოფებოდით. საარჩევნო კამპანიის ფარგლებში ძალიან ბევრ ადამიანს შევხვდით და ეს განწყობები რაც არის, გვაძლევს იმის თქმის საფუძველს, რომ პირველივე ტურში გვაქვს დიდი შესაძლებლობა, გავიმარჯვოთ მეორე ტურების გარეშე.
გუშინაც აღვნიშნე და კიდევ ერთხელ გავიმეორებ, რეალურად ქვეყანაში ერთადერთი პოლიტიკური ძალა, ვისაც აქვს ხედვა, როგორ განავითაროს ქვეყანა, როგორ შეინარჩუნოს სტაბილურობა, მშვიდობა და მოახერხოს ქვეყნის განვითარება რაც შეიძლება სწრაფად, ეს არის „ქართული ოცნება-დემოკრატიული საქართველო“, – განაცხადა კალაძემ.
თბილისის მერის განცხადებით, დესტრუქციული პოლიტიკური ძალები გარკვეულ არეულობებს გეგმავენ, რაც კანონის სრული სიმკაცრით დაისჯება.
„რაც შეეხება დარღვევებს, არანაირი კარუსელი არ არსებობს. ის დესტრუქციული და რადიკალური პოლიტიკური ძალები შეეცდებიან არეულობის შემოტანას, მაგრამ კიდევ ერთხელ ვაფრთხილებ ყველას, არავის არაფერი არ გამოუვა. ვინც გაბედავს რაიმე არასწორ ქმედებას, დაისჯებიან კანონის სრული სიმკაცრით“, – განაცხადა მან.