31, ოქტომბერი 2020 14:19:00
„ევროპული საქართველოს“ წევრის განცხადებით, ადმინისტრაციული რესურსის უხეშად გამოყენება ხდება. სერგი კაპანაძის განამრტებით, დაფიქსირდა შემთხვევები, როცა გამგებლები და სკოლის დირექტორები 25-მეტრიანი პერიმეტრის დარღვევით აგიტაციას ეწევიან, ამომრჩეველს ემუქრებიან და ეუბნებიან, რომ ხმა მისცენ „ქართულ ოცნებას“, წინააღმდეგ შემთხვევაში, მოუხსნიან სოციალურ დახმარებას.
"ძალიან ბევრ დარღვევას ვხედავთ. რამდენიმე სერიოზული დარღვევა დაფიქსირდა, როცა ამომჩეველი ფოთის პირველ საარჩევნო უბანზე მივიდა, აღმოაჩინა, რომ უკვე ხმა ჰქონდა მიცემული. როგორც ჩანს, ასეთი შემთხვევები სხვაგანაც არის. თუ მასიური ხასიათი ექნება, ეს არის ძალიან სერიოზული პრობლემა.
ვხედავთ, ადმინისტრაციული რესურსის უხეშად გამოყენებას. შემთხვევები გვაქვს, როცა გამგებლები და სკოლის დირექტორები 25-მეტრიანი პერიმეტრის დარღვევით აგიტაციას ეწევიან, ამომრჩეველს ემუქრებიან და ეუბნებიან, რომ ხმა მისცენ „ქართულ ოცნებას“, თორემ სოციალურ დახმარებას წაართმევენ.
სერიოზული პრობლემაა ასევე ბიულეტენებზე, რომელსაც ორი ნომერი მოხეული აქვს. ეს მოხდა ბათუმში მე-60 და მე-7 საარჩევნო უბნებზე. როგორც ჩანს, ასეთი ინსტრუქცია აქვთ მიცემული, რადგან ასეთი ფაქტები დაფიქსირდა ვაკეში, საგარეჯოში, გურჯაანში, მარნეულში. ეს არ არის ერთეული შემთხვევა, როცა რეგისტრატორები, რომლებიც „ქართული ოცნების“ წარმომადგებლები არიან, ბიულეტენს შეგნებულად აძლევენ და 2 ნომრის არჩევის საშუალება არ არის.
რეგისტრატორი ვალდებულია, ამომრჩეველს ახალი ბიულეტენი მისცეს. ასეთი იაფი ხრიკებით არჩევნებზე გავლენას ვერ მოახერხებენ“, – განაცხადა კაპანაძემ.