04, დეკემბერი 2020 21:59:00
ისევ პროტესტი და ისევ უცვლელი მოთხოვნები. მარადიდში მცხოვრებლები კირნათი ჰესის ფუნქციონირებას ეწინააღმდეგებიან. ადგილობრივები ამბობენ, რომ ჰიდროელექტროსადგურმა მათ ყოველდღიურობას რიტმი ისევე შეუცვალა, როგორც ჭოროხის დინებას. მოსახლეობა ირწმუნება, რომ დაგუბებულ ჭოროხს სოფლის მდინარეების ნატანი აღარ გააქვს, რის გამოც კალაპოტები წყლით ივსება. ეს კი ახლოს მდებარე სახლებს საფრთხეს უქმნის. პირობებით უკმაყოფილო მარადიდელების თქმით, ყველა ოჯახის ინტერესი დაცული ამ დრომდე არ არის.
მიწა, რომელზეც გურამ მსხალაძემ, ბაღი, საკუთარი ხელით გააშენა და რომლითაც მრავალი წელია სარგებლობს, სახელმწიფომ, საკუთრებაში არ დაურეგისტრირა. შესაბამისად, კომპენსაციის გარეშე დარჩა. თანხა არც საცხოვრებელში გადაუხადეს, რადგან სახლი დატბორვის ზონაში არ მოხვდა. თუმცა ეცვლება სახლთან მისასვლელი გზა. იმას, რომლითაც ახლა სარგებლობს, ჰესისთვის გაკეთებული ავზი დაფარავს.
განსხვავებით გურამისგან, საცხოვრებელი და საკარმიდამო ნაკვეთი რეგისტრირებული აქვს ევა დიდმანიძეს. 7 წევრიანი ოჯახი დატბორვის არეალში მოხვდა, თუმცა ჰესის მშენებელი კომპანიის მიერ შეთავაზებული კომპენსაცია დიდმანიძეებმა არ აიღეს და გასახლებაზე უარი თქვეს. სანაცვლოდ, ეკონომიკის სამინისტრომ, ოჯახს, სახლი ექსპროპრიაციის წესით ჩამოართვა.
ექსპროპირაციის წესით, საკუთრება, მარადიდში მცხოვრები კიდევ 34 ოჯახისთვის უნდა ჩამოერთვათ, რის გამოც მესაკუთრეთა უმრავლესობა იძულებული გახდა, რომ კომპანიის შეთავაზებას დათანხმებოდა.
ისინი, ვინც სოფელში დარჩნენ, შიშობენ, რომ დროთა განმავლობაში მეწყრული პროცესები გააქტიურდება და უარესი საფრთხის წინაშე აღმოჩნდებიან.
„კირნათი ჰესის“ მშენებლობა უკვე დასრულებულია. ელექტროსადგური ჯერ მხოლოდ ნაწილობრივი დატვირთვით მუშაობს. იმისთის, რომ სრულად ამოქმედდეს, საჭიროა, უკვე არსებული დატბორვის ნიშნული გაიზარდოს, ეს კი საცხოვრებლებისა და ნაკვეთების წყლით დაფარვას გულისხმობს. შედეგად, დაიტბორება სოფლის სასაფლაოც.
ჰესის მფლობელი კომპანია მოსახლეობისგან საკუთრების გამოსყიდვას უკვე რვა წელია აწარმოებს. "აჭარა ენერჯში" სატელევიზიო კომენტარს არ აკეთებენ. ხელვაჩაურის მერიაში კი, სიტყვიერად განმარტავენ, რომ ადგილობრივებს დახმარება და შუამავლობა კერძო კომპანიასთან ბევრჯერ გაუწიეს. პრობლემებს კი ის ქმნის, რომ რიგ ოჯახებს, შეთავაზებული კომპენსაციის ოდენობა არ აკმაყოფილებთ.