19, იანვარი 2021 21:30:00
ახლა კი გიამბობთ მწირი შემოსავლით მცხოვრებ მარტოხელა დედაზე, რომელიც 2 შვილს, 200 ლარიანი სოციალური დახმარების იმედად ზრდის. ლიანა ჭაღალიძისთვის განსაკუთრებულ პრობლემას პატარა შვილის გართულებული ჯანმრთელობის მდგომარეობა წარმოადგენს. ქალი 6 წლის გოგოს გადარჩენისთვის ჯანდაცვის სამინისტროს მიმართავს. რეპორტაჟი ამ წუთებში მზადდება, დაელოდეთ.
გურამიშვილის 67 ნომერში არსებული ბინა, ლიანა ჭაღალიძემ, თითქმის 4 თვის წინ იქირავა. ეს ის ფართია, რომლის ქირაობაც სწორედ მისი შემოსავლის გათვალისიწნებით შეძლო. ყველაფერი 20 კვადრატულ მეტრში აქვს: საძინებელიც, სასტუმრო ოთახიც და სამზარეულოც. საწოლები არ აქვთ. ოჯახის 3-ვე წევრი დივანზე იძინებს. გამათბობელის ნაცვლად კი სამზარეულოს გაზქურას იყენებენ.
ოჯახის შემოსავალი იმდენად მწირია, რომ ელემენტარული მოთხოვნების დაკმაყოფილებაც კი უჭირთ. აქვთ 200 ლარიანი სოციალური დახმარება. თანხა საკვებისთვის აქვთ გამოყოფილი. ლიანას უფროსი შვილი მუშაობს. სწორედ მისი ხელფასით იხდიან 250 ლარიან ქირას და ფარავენ კომუნალურ ხარჯს.
უმცროსს, 6 წლის შვილს ჯანმრთელობის პორბლემები აქვს. მოზარდს, ნეფროზული სინდრომის დიაგნოზი, გასული წლის თებერვალში დაუდგინეს. მკურნალობის კურსი რამდენჯერმე დაიწყო, თუმცა ბოლომდე ვერასდროს მიიყვანა. მედიკამენტი, რომელიც სამკურნალოდ სჭირდება, საქართველოში არ იყიდება, პრეპარატის უცხოეთიდან ჩამოტანა კი ძვირი უჯდება.
მარტოხელა დედა ახლა ჯანდაცვის სამინისტროს დახმარების იმედადაა. იგი მხარადჭერისთვის აჭარის მთავრობასაც მიმართავს და სთხოვს, დააკმაყოფილონ საცხოვრებლით.
უქმეების გამო, დღეს მაცნეს კითხვებს უწყებებში არ უპასუხეს.