26, თებერვალი 2021 17:13:00
ბათუმის მუციპილაიტეტის 2021 წლის მთავარ ფინანსურ დოკუმენტში ცვლილებები შევიდა. გადაწყვეტილებები დღეს, საკრებულოს სხდომაზე მიიღეს. ცვლილებების მიხედვით, ბიუჯეტის კაპიტალური პროექტების დაფინანსება იზრდება. რეკონსტრუქცია უნდა ჩაუტარდეს საზაფხულო თეატრის შენობას.
იმ ნაშთის ხარჯზე, რომელიც ბათუმის მერიას გასულ წელს აუთვისებელი დარჩა, 2021 წლის ბიუჯეტი, 7 მილიონი ლარით გაიზარდა. საერთო ჯამში, ახლა ქალაქის ხაზინა 158 მილიონია. გადმოსული თანხიდან, ექვსი მილიონ 500 ათასი, საკრებულომ მერიას, კაპიტალური პროექტებისთვის დაუმატა.
ცვლილებები შეეხო ჯანდაცვის პროგრამასაც. მერია, მარტიდან იმაზე მეტ, სამშვილიან, სოციალურად დაუცველ ოჯახს დააფინანსებს, ვიდრე დღეს.
საკრებულოს დღევანდელი გადაწყვეტილებით, ის ბენეფიციარები, რომელთაც აქვთ 0-დან 65 ათასამდე სარეიტინგო ქულა, „ხელმისაწვდომი საცხოვრისის“ პროექტში მონაწილეობას ვეღარ მიიღებენ.
არის კიდევ ერთი სიახლე. ადმინისტრაციულ დარღვევას, რომელსაც ქალაქში, ვიდეო ან ფოტოფირი დააფიქსირებს და დაიწერება ჯარიმა, ქვითარი „მუნიციპალური ინსპექციის" ვებ-გვერდზე გამოქვეყნდება. ეს იმ შემთხვევაში, თუ კი, კანონდამრღვევი, სხვადასხვა მიზეზით, მას არ გადაიხდის.
საკრებულოს გადაწყვეტილებით, ბათუმში, მემედ აბაშიძის 42 ნომერში, იქ სადაც ნესტორ ხვინგიას სტამბა არსებობდა, მემორიალური დაფა განთავსდება. სწორედ ხვინგიას სტამბაში დაიბეჭდა 1921 წელს საქართველოს პირველი კონსტიტუცია.