01, მარტი 2021 21:17:00
საქართველოში არქვისტის კვირეული დაიწყო, თუმცა წელს პირველი შემთხვევაა, როცა აჭარის საარქივო სამმართველომ, საგანგებო ღონისძიებას ორგანიზება ვერ გაუწია. ცხადია, პანდემიის მიზეზით, თუმცა საცავებს ჩემი კოლეგა მანიც ესტუმრა. რა სამუშაოები მიმდინარეობს არქივში, როგორ იცავენ და ინახავენ 2 500 - ზე მეტ ფონდს და 600 ათასზე მეტ საქმეს.
ეს 5 საცავიდან ერთ-ერთია. სივრცე 300 ათასამდე საქმეთა ერთეულს წლებია ინახავს. აქ სუნიც სპეციფიკურია, ძველი დოკუმენტების, რომელმაც დროს არქივისტების დამსახურებით გაუძლო. ადამიანების, რომელთა ყოველდღიურობა ზუსტად 1 672 ფონდის მოვლა-პატრონობას ემსახურება.
საცავში დაცული უნიკალური მასალები და მილიონობით ისტორიულად მნიშვნელოვანი ფაქტების ამსახველი დოკუმენტაცია სპეციალურ მოვლას საჭიროებს. იმისთვის, რომ არქივისტებმა მასალები მარტივად იპოვონ, სტელაჟებზე ინფორმაციაა დატანილი. ამის მიუხედავად, კოლექციების პოვნას სირთულეები მაინც ახლავს.
ყველაზე ძველი, ანუ ფონდი 1799 წლიდან საეკლესიო ჩანაწერებია. სტელაჟი დაბადების, ქორწინების და გარდაცვალების შესახებ ინფორმაციას აერთიანებს.
ფონდები დროთა განმავლობაში ძველდება და დროს ვერ უძლებს. გაცვეთილი ფურცლების ასაღდგენად და არქივში დაცული კოლექციების შესანარჩუნებლად, არქივისტები მათ რესტრავრაციაზე ფიქრს იწყებენ. დაძველებული დოკუმენტები ამ სივრცეში ხვდება, სადაც რამდენიმე ეტაპს გადის:დაზიანების განსაზღვრა, ფუნჯით გაწმენდა, დაშლა, აღდგენა, დაპრესვა და აკინძვა. ეს ყველაფერი შიშველი ხელებითა და ძველი ტექნოლოგიებით მიმდინარეობს. ასე იბრუნებს ძველ იერსახეს ასობით მასალა:
იმისთვის, რომ კოლექციები სრულად შენარჩუნდეს და მათი ძიება გამარტივდეს, არქივი თითქმის 10 წელია მათ დიგიტალიზაციას ახორციელებს. 2012 წლიდან დღემდე 30-ზე მეტი ფონდი ანუ 10 მილიონზე მეტი ფურცელი გაიციფრა. არქივში 600 ათასამდე უნიკალური დოკუმენტია დაცული.