03, მარტი 2021 21:59:00
რამდენად ხარისხიანია პროდუქცია, რომელსაც ყოველდღიურად ყოველი ჩვენგანი მოიხმარს სახლსა თუ სამსახურში? ქვეყნის მდგომარეობასა და სოციალურ ფონს თუ გავითვალისწინებთ, ალბათ დამეთანხმებით, რომ ხშირ შემთხვევაში, მოქალაქეთა საკმაოდ დიდი ნაწილი არჩევანს დაბალ ფასზე აკეთებს, რაც დაბალხარისხსაც განაპირობებს, ამ ყველაფერს კი საბოლოო ჯამში ჯანმთელობის გაუარესებასთან მივყავართ. სწორედ ამიტომ, მესამე სექტორი დაფიქრდა, ხომარ არის აუციელებელი არასასურსათო სამომხმარებლო პროდუქციის ხარისხის უსაფრთხოებაზე კონტროლის დაწესება. სტრატეგიული კვლევებისა და განვითარების ცენტრმა პარლამენტს პეტიციით უკვე მიმართა.
ტანსაცმელი, ფეხსაცმელი, ჭურჭელი და ავეჯი - ჩამოთვლილი სამომხმარებლო პროდუქცია მრავალფეროვნებით ყოველთვის გამოირჩეოდა. სხვაობა არა მარტო მათ ფასში, არამედ ხარისხშიცაა. უმეტეს შემთხვევაში, მწარმოებლები, სწორედ ამ უკანასკნელით განსაზღვრავენ პროდუქციის ფასსაც. ალბათ სადაო არცაა, რომ ყველას სურს მაღალხარისხიანი ნივთების შეძენა, თუმცა მეტწილად ამას ხელს ფინანსური მდგომარეობა არ უწყობს. შედეგად, ადამიანები იძულებულები არიან ხარისხის ნაცვლად, არჩევანი, ნაკლებ ბიუჯეტიან საქონელზე შეაჩერონ.
დაბალხარისხიანი სამომხმარებლო, არასასურსათო პროდუქცია ადამიანების ჯანმრთელობას რომ საფრთხეს უქმნის, საუბრობენ ალერგოლოგებიც. განსაკუთრებულ ყურადღებას ტანსაცმელსა და ფეხსაცმელზე ამახვილებენ. ამბობენ, რომ სისტემატურმა მოხმარებამ შესაძლოა, კანის დაავადებები გამოიწვიოს.
ამ ეტაპზე საქართველოში, ჭურჭლის, ფეხსაცმლისა და ავეჯის ხარისხს სახელმწიფო არ აკონტროლებს. სწორედ ამ მიზნით, სტრატეგიული კვლევებისა და განვითარების ცენტრმა, პარლამენტს, პეტიცია წარუდგინა. დოკუმენტი, 2021 წლის 26 თებერვლით თარიღდება და მას ხელს 1 001 მოქალაქე აწერს. საკანონმდებლო ინიციატივის პირველი განხილვის შედეგები 2 კვირაში უნდა გახდეს ცნობილი.
იმ შემთხვევაში, თუ კი დაბალხარისხიანი პროდუქციაზე კონტროლი გამკაცრდება, რა ზეგავლენა შეიძლება მოახდინოს ამ გარემოებამ საქართველოს ეკონომიკაზე? დარგის სპეციალისტის შეფასებით, ეს ნაბიჯი პროდუქციაზე ხელმისაწვდომობას შეამცირებს, რაც გაცილებით მეტ პრობლემას წარმოშობს. ნოდარ სირბილაძის თქმით, იმ ფონზე, როცა პანდემიაა და მოსახლეობის დიდი ნაწილი შემოსავლის გარეშეა, მოქალაქეები, დაბალფასიანი პროდუქციის შეძენასაც ვერ ახერხებენ.
ერთი მაღალხარისხიანი თუ რამდენიმე უხარისხო? საბოლოო გადაწყვეტილება მაინც თავად უნდა გააკეთოთ, თუმცა, ფაქტია, რომ ყურადღება არა ფასზე, არამედ თქვენს ჯანმრთელობაზე უნდა გაამახვილოთ.