24, მარტი 2021 11:48:00
ჯანდაცვის საპარლამენტო კომიტეტის თავმჯდომარის მოადგილემ „ასტრაზენეკას“ ვაქცინა საჯაროდ გაიკეთა. ლადო კახაძე პარლამენტის პირველი წევრია, რომელიც კორონავირუსის საწინააღმდეგო ვაქცინით აიცრა.
აცხადებს, რომ ვაქცინაციის შემდეგ თავს კარგად გრძნობს. მისივე თქმით, განწყობა კარგი აქვს და ამბობს, რომ პანდემიის დამარცხების გზაზე ვაქცინაცია არის აბჯარი, რითაც ადამიანი ორგანიზმში იმუნურ სისტემას იმაღლებს.
"მთავარი არის ჩვენი თანადგომა და ურთიერთპატივისცემა, გონივრული და პრაგმატული მიდგომა – ეს არის გზა, რომ პანდემიის სახით არსებული ძალიან დიდი გამოწვევა დავძლიოთ და გავიდეთ ამ მდგომარეობიდან. ჩვენ წინ ნახტომისებური განვითარება გველოდება. ამიტომ ჯანმრთელები და აბჯარასხმულები უნდა შევხვდეთ. ვაქცინაცია არის აბჯარი, ორგანიზმის საკუთარი იმუნური სისტემის გაძლიერება და იმ შემთხვევაშიც, თუ ვირუსი აცრილი ადამიანის ორგანიზმში მოხვდება, განადგურდება." - განაცხადა კახაძემ.