01, აპრილი 2021 09:45:00
საქართველოს შინაგან საქმეთა სამინისტრომ, რუსი პროპაგანდისტი ჟურნალისტის, ვლადიმერ პოზნერის სტუმრებიდან 32 პირი იზოლაციისა და კარანტინის წესის დარღვევის გამო დააჯარიმა. დაჯარიმებულთა შორისაა თავად პოზნერი.
რაც შეეხება სხვა პირებს, შსს-ს ცნობით, 41 პირიდან 9 პირს იზოლაციისა და კარანტინის წესები არ დაურღვევია.
„საპატრულო პოლიციის დეპარტამენტის თანამშრომლებმა, იზოლაციისა და კარანტინის წესის დარღვევის ფაქტზე, ასკ-ის 42(10) - ე მუხლის შესაბამისად, 32 პირი დააჯარიმეს.
ქვეყნის ტერიტორიაზე შემოსული 41 პირიდან 9 პირს, იზოლაციისა და კარანტინის წესები არ დაურღვევია. გვიან ღამითვე დაჯარიმდა სასტუმრო “ვინოტელი”.
შეგახსენებთ, რომ რუსი პროპაგანდისტი ჟურნალისტი, ვლადიმერ პოზნერი საქართველოში სტუმრებთან ერთად დაბადების დღის აღსანიშნავად იყო ჩამოსული, თუმცა ქართველი აქტივისტების პროტესტის გამო, ის იძულებული გახდა თბილისი ვადაზე ადრე, ჩარტერული რეისით დაეტოვებინა.