პოლიტიკურად მიუკერძოებელი სასამართლოს შექმნა ქართული დემოკრატიიის ერთ-ერთ მთავარ გამოწვევად რჩება. ღირს გახსენებად, გასულ წლის ნოემბერში ამერიკის შეერთებული შტატების სახელმწიფო დეპარტამენტში გაკეთებული განცხადება, რომლის მიხედვითაც, საქართველოში დამოუკიდებელი სასამართლო სისტემა არ არსებობს. კიდევ ერთი ხარვეზი, რომელიც ქართულ მართლმსაჯულებას აქვს , გამჭვირვალობის დაბალი ხარისხია. ამაზე რეპორტაჟი ჩვენს ეთერში გუშინ გავიდა. დღეს კვლავაც სასამართლო სისტემაში არსებულ პრობლემებზე უნდა გიამბოთ.
„ბათუმის ციხის ყოფილი უფროსების საქმე“ ერთ-ერთი გახმაურებული და რეზონანსულია. 2014 წლიდან დღემდე ათობით პროცესი ჩატარდა. გამოძიება კი მეშვიდე წელია უშედეგოდ ცდილობს დაადგინოს, ჰქონდა თუ არა ასზე მეტი ნაწამები პატიმრის მიმართ, პენიტენციური დაწესებულების ყოფილი უფროსის მხრიდან არაადამიანურ და სასტიკ მოპყრობას ადგილი.
ციხის უფროსების საქმე საიას ანგარიშში მოხვდა. „საქართველოს ახალგაზრდა იურისტთა ასოციაციამ“ 1 300-ზე მეტი სისხლის სამართლის პროცესი ბოლო 4 წლის განმავლობაში შეისწავლა. არასამთავრობო ორგანიზაციის თავმჯდომარის შეფასებით, მთავარი გამოწვევა სხდომების გაჭიანურებაა. მესამე სექტორში პროკურატურის მხრიდან პატიმრობის მოთხოვნის გაზრდილ მაჩვენებელზეც საუბრობენ და ამბობენ, რომ გადაწყვეტილებები ხშირ შემთხვევაში დაუსაბუთებელი და შაბლონურია.
ორგანიზაციაში უარყოფითად აფასებენ იმასაც, რომ აღკვეთის ღონისძიებების სახით ამ დრომდე მხოლოდ პატიმრობა და გირაოა გამოყენებული.
მესამე სექტორი პრობლემურად მიიჩნევს გადაუდებელი აუცილებლობით ჩატარებული ჩხრეკა-ამოღების დაკანონების საკითხსაც. საიაში ამბობენ, რომ სასამართლო პროკურატურის შუამდგომლობების 99 პროცენტს დაუსაბუთებლად აკანონებს, განჩინებები კი შაბლონურია. ამის მაგალითად ციფრები მოჰყავთ: სამონიტორინგე პერიოდში 50 ათასი მოთხოვნიდან, სასამართლომ მხოლოდ 700 არ დააკმაყოფილა. ამას ყოველდღიურობაში ხედავენ ადვოკატებიც. ოპოზიციაში კი ფიქრობენ, რომ ხარვეზების აღმოსაფხვრელად სისტემაში ძირეული ცვლილებებია გასატარებელი.
მესამე სექტორს ხარვეზების აღმოსაფხვრელად რეკომენდაციები აქვს. საია მიიჩნევს, რომ პარლამენტმა აღკვეთის ღონისძიებების სახეები უნდა გააფართოვოს, პროკურატურამ კი ჩხრეკა- ამოღების დროს დაცვის გარანტიები შექმნას. ამ უკანასკნელში მესამე სექტორი აუდიო-ვიდეო გადაღების შესაძლებლობას გულისხმობს.
4
s
s
s