23, აპრილი 2021 21:45:00
მესამე ტალღა დაიწყო, ინფიცირების შემთხვევები იმატებს, საზოგადოება კი კვლავ მოდუნებული და დაბნეულია. მოქალაქეების დიდი ნაწილი იმუნიზაციაზე უარს ამბობს და რეგულაციებსაც არ იცავს. რა იწვევს ანტივაქსერულ განწყობებს ან რას ფიქრობს ხალხი ავაქცინაციის პროცესთან დაკავშირებით? მოსახლეობის აზრები რამდენიმე მიმართულებით გაიყო. თეო ფუტკარაძემ იკითხა ქობულეთში, რატომ ამბობენ ადგილობრივები ავრაზე უარს.
ქვეყანაში კორონავირუსის საწინააღმდეგო ვაქცინაცია თითქმის ორი თვეა რაც დაიწყო, თუმცა, მოქალაქეებს პრეპარატის ეფექტურობის, ისევ, არ სჯერათ. ამბობენ, რომ აცრის შემადგენლობაზე ინფორმაცია არ აქვთ და უნდობლობის მიზეზად, სწორედ, ამას ასახელებენ.
შემთხვევითი გამოკითხვის პრინციპით, მოქალაქეების აზრი ვაქცინის თაობაზე, ამჯერად, ქობულეთის მუნიციპლაიტეტში ვიკითხეთ. ადგილობრივები, პანდემიის საწინააღმდეგო აცრისადმი უნდობლობის მიზეზად, ახალციხეში დატრიალებულ ტრაგედიას ასახელებენ.
ჩვენს მიერ გამოკითხულ მოქალაქეებს შორის არიან ისეთებიც, რომლებიც აცრის გასაკეთებლად უკვე დარეგისტრირდნენ. არიან ისიეთებიც, რომლებმაც ვაქცინა უკვე გაიკეთეს. მათივე განმარტებით, იმუნიზაციამ მათ სიმშვიდე მოუტანა.
შეგხვდნენ ისეთებიც, ვისაც აცრის მიმართ დადებითი დამოკიდებულება და განსაკუთრებული მოლოდინი აქვთ. ამბობენ, რომ თუ კი ვაქცინაცია პანდემიის დამარცხების ერთადერთი გზაა, ეს პასუხისმგებლობა ყველა მოქალაქემ უნდა გაითავისოს.
ჩვენ ვეცადეთ გაგვეგო, თუ რას ფიქრობდნენ ქობულეთის მუნიციპალურ ორგანოებში დასაქმებული საჯარო მოხელეები, აცრასთან დაკავშირებთ. აპირებენ თუ არა ვაქცინაციის პროცესში ჩართვას? ჩვენთვის გაუგებარი მიზეზით, კითხვაზე პასუხი ვერ მივიღეთ. შეგახსენებთ, მუნიციპალიტეტის ხელმძღვანელ პირებს, მოქალაქეებისთვის იმუნიზაციასთან დაკავშირებით მოწოდებებიც არ გაუკეთებიათ.
საქართველოში ვაქცინაზე საყოველთაო რეგისტრაცია უკვე დაიწყო, თუმცა, ამ ეტაპზე, იმუნიზაციის პროცესი, მხოლოდ, მედპერსონალსა და 55 წელს ზემოთ მყოფ მოქალაქეებს უტარდებათ.