24, მაისი 2021 14:33:00
"ნამახვანჰესის" მშენებლობის წინააღმდეგი აქციის ერთ-ერთი ლიდერი, ვარლამ გოლეთიანი მოქალაქეებს მოუწოდებს გავიდნენ რესპუბლიკის მოედანზე და "არ დატოვონ იქ თავისუფალი ადგილები". ეს არის პირველი საჯარო მიმართვა მოქალაქეების მიმართ მას შემდეგ, რაც ცნობილი გახდა, რომ ხელისუფლება არ აპირებს მათი მოთხოვნები შეასრულოს.
"ჩვენ კონსტრუქციულად და სამართლიანად მივიყვანთ ამ ბრძოლას ბოლომდე... ჩვენ ულტიმატუმებით არ ვსაუბრობთ, ჩვენ ნახევარ წელზე მეტი გავატანეთ რიონის პირზე და სახლში არ შევსულვართ პრაქტიკულად და საზოგადოებისთვის გაგვეცნო რაშია პრობლემა და მოვუწოდებდით მათ [ხელისუფლებას], თუ ჰქონდათ თავი ჩვენთან ემსჯელათ. ამის შემდეგ გვრჩება ერთადერთი გზა - ან ვიშლებით ან მაშინ მშვიდობიანად მიგვყავს საქმე ბოლომდე...
თუ ჩვენ ახლა არ ვიმოქმედებთ, ეს არის ქართველი ხალხის დამარცხების ტოლფასი, რომელსაც უკვე შეიძლება ჩვენ ვეღარ მოვერიოთ უახლოესი ათწლეულების განმავლობაში. ამ დამარცხებას ქართველი ხალხი არ დაუშვებს", - თქვა გოლეთიანმა.
"ნამახვანჰესის" მშენებლობის მოწინააღმდეგეთა აქციამ რიონის ხეობიდან თბილისში გუშინ გადმოინაცვლა. აქციის მონაწილეებმა მთავრობას მოთხოვნები წაუყენეს და რამდენიმე საათი მისცეს. ამ ვადის ამოწურვამდე რამდენიმე წუთით ადრე პრემიერ-მინისტრმა ირაკლი ღარიბაშვილმა თქვა, რომ "ულტიმატუმებით საუბარი ბნელი 90-იანების გადმონაშთია".