27, მაისი 2021 21:45:00
თვითნებურად მითვისებული პარკირების ადგილები. გიყვებით პრობლემაზე, რომელიც ბათუმში ავტომობილით გადაადგილებას მოუხერხებელს ხდის. ქუჩებში ხშირად შეხვდებით სიტუციას, როცა მანქანების გასაჩერებელი ადგილები ამა თუ იმ სასტუროს, ობიეტქსა თუ ქუჩაზე მცხოვრებლებს სპეციალური საგზაო ნიშნულებით ჩახერგილი აქვთ. უწყებები, რომლებსაც ამ საკითხის გადაჭრა ევალებათ, წლების განმავლობაში რეალობას ვერ ცვლიან.
„არ გააჩეროთ“ , „გაჩერება აკრძალულია“, ჯარიმა ორასი ლარი“- ამ შინაარსის წარწერებს, ბათუმის თითქმის ყველა უბანში ნახავთ. სახლების ჭიშკრებზე, თვითნებურად გაკეთებულ ბანერებზე ნიშნულიცაა, რომ ავტომობილის გაჩერების შემთხვევაში, მანქანას ევაკუატორი წაიყვანს. იმის შიშით, რომ შესაბამისი სამსახური, ავტომობილს საჯარიმო სადგომზე გადაიყვანს, მოქალაქეები გამოსავალს ასე პოულობენ. ტრანსპორტის სავალ ნაწილზე პარკინგის გამო კი, ჯარიმებიც მრავლად აქვთ.
ისიც ცნობილი ფაქტია, რომ თვითნებურად პარკინგის ნაწილს სასტუმროებიც ითვისებენ, თუმცა, აქ განსხვავებული მეთოდი აქვთ. ჰყავთ ავტომესადგომე, რომელიც სასტუმროს ტერიტორიაზე, ავტომობილების გაჩერებას კატეგორიულად კრძალავს. ადგილი კი, გამაფრთხილებელი ნიშნულებით აქვთ შემოსაზღვრული. ფაქტის გამო პროტესტს გამოთქვამენ მძღოლები.
რატომ არ აძლევენ, რიგით მოქალაქეებს, სასტუმროს ტერიტორიაზე, ავტომობილის გაჩერების უფლებას? აქ, პირად საუბარში დაადასტურეს, რომ ტერიტორია, რომელსაც საპარკინგედ იყენებენ შესყიდული არ აქვთ, ჩართულ კამერებთან კი, ერთ-ერთმა წარმომადგენელმა, კითხვებზე თავის არიდების მიზნით გვითხრა, რომ ადგილზე არ მუშაობს.
პრობლემა, რომ არსებობს არ უარყოფენ აჭარის უმაღლეს საბჭოში. დავით ბაციკაძე ამბობს, რომ საკითხის კონტროლს ბათუმის მუნიციპალური ინსპექცია ახორციელებს, თუმცა, შესაბამისი სამსახური მდგომარეობას, რომ ვერ აგვარებს ფაქტია.
დავინტერესდით იმით, რამდენი მოქალაქე ან სასტუმრო ჯარიმდება მსგავსი ქმედებისთვის. „მუნიციპალურ ინსპექციაში“ სიტყვიერად განმარტეს, რომ მსგავსი წარწერა ბევრი ჭიშკრიდან წაშალეს. მათი თქმით, მოაქალაქეებმა მიიღეს სანქციებიც და სიტყვიერი გაფრთხილებაც, თუმცა, უფრო დეტალურად, კითხვებზე საპასუხოდ, პასუხისმგებელი პირები მზად არ აღმოჩდნენ.