21, ივნისი 2021 21:20:00
გასულ წელს საჯარო ინფორმაციის ხელმისაწვდომობის ხარისხი წინა წელთან შედარებით კვლავ გაუარესდა. კვლევა „ინფორმაციის თავისუფლების განვითარების ინსტიტუტმა“ ჩაატარა. მესამე სექტორმა ქვეყნის მასშტაბით, სხვადასხვა სახის ინფორმაცია გამოითხოვა, რაც უწყებების 30-მა პროცენტმა უპასუხოდ დატოვა. ერთ ერთი ასეთი დახურული და არაანგარიშვალდებული - შუახევის მუნიციპალიტეტის საკრებულო აღმოჩნდა.
შუახევის მუნიციპალიტეტის საკრებულო ერთ-ერთია იმ 13-ს შორის, რომელსაც 2020 წლის ყველაზე არა-ანგარიშვალდებული საჯარო დაწესებულების სტატუსი ერგო. მუნიციპალიტეტის წარმომადგენლობითი ორგანო მოხვდა ყველაზე დახურულ რეგიონულ უწყებებს შორისაც. პანდემიის პერიოდში საჯარო ინფორმაციის ხელმისაწვდომობა „ინფორმაციის თავისუფლების განვითარების ინსტიტუტმა“ გამოიკვლია.
არასამთავრობო ორგანიზაციის მიერ ჩატარებული კვლევის საფუძველზე შესაძლოა ითქვას, რომ 2020 წელს საჯარო დაწესებულებებიდან მიღებული პასუხების მაჩვენებელი, 2013 წლის შემდეგ ყველაზე დაბალია. მესამე სექტორში ვარაუდობენ, რომ კორონავირუსის პანდემიით შექმნილი მდგომარეობა არა ანგარიშვალდებულმა საჯარო დაწესებულებებმა საჯარო ინფორმაციის არაკეთილსინდისიერად შეზღუდვის დამატებით მოტივად გამოიყენეს.
ახმეტის, ბოლნისის, თეთრიწყაროს, ლენტეხის, სიღნაღის, ახალქალაქის, ბოლნისის და ადიგენის მუნიციპალიტეტების საკრებულოსთან ერთად შუახევის საკრებულო არა-ანგარიშვალდებულებებს შორის აღმოჩნდა. წარმომადგენლობითმა ორგანომ 19 მოთხოვნიდან 19-ვე უპასუხოდ დატოვა. რა მიზეზით არ გასცა უწყებამ საჯარო ინფორმაცია და იყო თუ არა პანდემია შემაფერხებელი მოტივი? შუახევის საკრებულოს თავმჯდომარემ სამუშაო საათებში, ჩვენთან სასაუბროდ ვერ მოიცალა.
ოპოზიციაში არ უკვირთ, რომ შუახევის საკრებულო არა-ანგარიშვალდებულ და ჩაკეტილ უწყებებს შორის მოხვდა. საკრებულოს დეპუტატი „ერთიანი ნაციონალური მოძრაობიდან“ ამბობს, რომ ამ გზით უწყებაში იმ დარღვევების დაფარვას ცდილობენ, რომელსაც ყოველდღიურ რეჟიმში უშვებენ.
საჯარო ინფორმაციის ხელმისაწვდომობის მონიტორინგს „ინფორმაციის თავისუფლების განვითარების ინსტიტუტი“ 2010 წლიდან ახორციელებს. როგორც აღმოჩნდა, გასულ წელს IDFI-ს
6,258 მოთხოვნიდან, 10 დღიანი ვადის დაცვით ინფორმაცია მხოლოდ 3,043 შემთხვევაში მიაწოდეს, ეს კი 48 პროცენტია.