26, ივლისი 2021 10:28:00
დაავადებათა კონტროლისა და საზოგადოებრივი ჯანმრთელობის ეროვნულმა ცენტრმა კორონავირუსის საწინააღმდეგო ვაქცინაციაზე ანგარიში გამოაქვეყნა. კვლევა 2021 წლის 15 მარტიდან — 15 ივლისის პერიოდს მოიცავს.
NCDC-ის განცხადებაში აღნიშნულია, რომ მინიმუმ ერთი დოზით აცრილ ინფიცირებულთა შორის კორონავირუსით დაავადების შედეგად სიკვდილიანობის მაჩვენებელი 0.99%-ის ტოლია, რაც მნიშვნელოვნად ნაკლებია ქვეყნის მასშტაბით, იმავე პერიოდში ≥18 წლის პოპულაციაში, COVID-19-ით დაავადებულთა შორის დაფიქსირებულ ლეტალობის მაჩვენებელზე (2.16%).
უნდა აღინიშნოს, რომ კორონავირუსის მიმართ იმუნიტეტის გამომუშავება ადამიანებში ორი დოზის მიღებიდან 2 კვირის ინტერვალში ხდება. ქვეყანაში COVID-19-ის დაავადებით დაღუპულთა საერთო რაოდენობაში ერთი დოზით აცრილთა ხვედრითი წილი 0.22%-ია და რაც ყველაზე მნიშვნელოვანია, 2 დოზით აცრილთა შორის კორონავირუსის გადატანის შედეგად სიკვდილის შემთხვევა საერთოდ არ დაფიქსირებულა.