მართვის მოწმობის რეალურ პირობებში ჩაბარება 2022 წლის 25 აპრილიდან, b და be კატეგორიის ავტომობილებზე, ხოლო 2022 წლის 7 ნოემბრიდან, ყველა სახის მოძრაობის საშუალებაზე იქნება სავალდებულო. პარლამენტმა შინაგან საქმეთა სამინისტროს მიერ ინიცირებულ კანონპროექტს სამი მოსმენით დაუჭირა მხარი, რაც ნიშნავს, რომ საკანონმდებლო მაცნეზე გამოქვეყნების შემდეგ, ის ძალაში შევა. დეტალებს გოგა ანთიძე არკვევდა.
დარღვეული მოძრაობის წესების, საცობებისა და გახშირებული ავტოსაგზაო შემთხვევების ფონზე, შინაგან საქმეთა სამინისტრომ, მართვის მოწმობის ჩაბარების წესების ცვლილებას დაუჭირა მხარი. სატრანსპორტო საშუალების მართვის უფლების მისაღები გამოცდის პრაქტიკული ნაწილის ჩაბარება, იმიტირებული მოედნებთან ერთად, ქალაქის ქუჩებშიც სავალდებულო ხდება. მართვის მოწმობის მისაღებად, რეალურ პირობებში ავტომობილით მოძრაობა, 2022 წლის 7 ნოემბრიდან გახდება სავალდებულო.
მართვის მოწმობის გამოცდის ჩაბარების წესი, რომ შესაცვლელია მძღოლების მიერ დაშვებული საგზაო მოძრაობის უხეში შეცდომებიც ადასტურებს. მოქალაქეები ახალ ცვლილებას, დადებითად აფასებენ. მათი თქმით, იმიტირებულ მოედანზე შეუძლებელია მოძრაობის წესების სწავლა, რის გამოც, ქალაქში ბევრი გამოუცდელი მძღოლია.
აღნიშნულ თემაზე, საუბარი საქართველოს ავტოსოლების ასოციაციის წევრთან, ვიქტორ კვირკველიასთან გავაგრძელეთ. იგი, შინაგან საქმეთა სამინისტროს მიერ მიღებულ გადაწყვეტილებას დაგვიანებულად აფასებს და ლიცენზირებული ავტო-სკოლების აუცილებლობაზე საუბრობს.
ამ დროისთვის მართვის მოწმობისთვის გამოცდის ჩაბარება ერთეტაპიანია და სპეციალურად მოწყობილ მოედნებზე მიმდინარეობს. სტატისტიკის მიხედვით, ავტოსაგზაო შემთხვევების რაოდენობა ყოველწლიურად იზრდება, რის გამოც, მძღოლებთან ერთად, ფეხითმოსიარულეებიც მუდმივად რისკის ქვეშ არიან. ვნახოთ, როგორ მოახერხებს გომელაურის უწყება, 2018 წელს დაანონსებულ, ახლა, უკვე, საკანონმდებლო სახით წარმოდგენილი ინიციატივის შესრულებას.
5
s
s
s