03, თებერვალი 2017 11:29:00
გადაადგილების კუთხით პრობლემებია ბათუმშიც. კვლავ გაუწმენდავია მეორეხარისხოვანი ქუჩების ნაწილი, რაც მძღოლებისთვის დამატებით პრობლემებს ქმნის. მოყინული ქუჩების გამო, ბოლო 24 საათის განმავლობაში რესპუბლიკური საავადმყოფოს ტრავმატოლოგიურ პუნქტს 17-მა პაციენტმა მიმართა. როგორც აქ ამბობენ, დაზიანებები მსუბუქი იყო და არცერთ პაციენტს სტაციონალური მკურნალობა არ დასჭირდა. მერიაში ამბობენ, რომ ბათუმის ქუჩების თოვლის საფარისგან გაწმენდა აქტიურად მიმდინარეობს. მოყინულ ქუჩებზე იყრება ტექნიკური მარილი. გადაადგილების კუთხით მდგომარეობა შედარებით გამოსწორდა ძველ ბათუმში. რაც შეეხება საგანმანათლებლო პროცესს. დღეს ქალაქში ყველა სკოლა და საბავშვო ბაღი ფუნქციონირებდა. თუმცა სკოლამდელი აღზრდის დაწესებულებებში აღსაზრდელების დაბალი სწრებადობა იყო. რეგისტრირებული 7460 ბავშვიდან 30 ბაღში 1086 გამოცხადდა. ერთკვირიანი პაუზის შემდეგ სწავლა განახლდა მე-7 საბავშვო ბაღშიც, სადაც სასწავლო პროცესი გამათბობლის ნაწილის დაზიანების გამო არ მიმდინარეობდა.