09, იანვარი 2017 12:51:00
„ნაციონალური მოძრაობის“ საარჩევნო სიაში მყოფი 8 დეპუტატობის კანდიდატი ხვალიდან სიაში აღარ იქნება. ეს იმ შემთხვევაშიც მოხდება, თუ ცენტრალური საარჩევნო კომისია პარტიის აღმასრულებელი მდივნისა და მისი თანამოაზრეების მოთხოვნას არ დააკმაყოფილებს. განხეთქილება პარტიაში თუ ერთგვარი სადამსჯელო ღონისძიება? ფაქტს დღეს ენმ-ს ბათუმის ორგანიზაციაში გამოეხმაურენ.
საარჩევნო სიიდან წაიშლება ომარ მეგრელიძეც. იგი სერგო რატიანისა და მისი თანამოაზრეების გადაწყვეტილებას მუხანათურს უწოდებს, მომხდარს კი პოლიტიკურ შურისძიებად და უფლებამოსილების გადამეტებად აფასებს. ომარ მეგრელიძე პარტიაში განხეთქილების დაწყების მიზეზებზე საუბრობს.
საარჩევნო სიიდან დეპუტატობის კანდიდატების ამოღების გადაწყვეტილებას კომპლექსური მიზეზებით ხსნის პარტიის ერთ-ერთი ლიდერი ზურაბ ჭიაბერაშვილი. მისი განმარტებით, აღნიშნულმა პირებმა პარტია ჩიხურ სიტუაციაში შეიყვანეს.
დააკმაყოფილებს თუ არა ცესკო პარტიის აღმასრულებელი მდივნის მოთხოვნას, ჯერ უცნობია. განცხადების დარეგისტრირებიდან სამი დღის შემდეგ, კანდიდატების სიიდან ამოღება ავტომატურად მოხდება.
"ერთიანი ნაციონალური მოძრაობის" ე.წ მიხეილ სააკაშვილის ფრთის წარმომადგენლები აცხადებენ, რომ სერგო რატიანისა და მისი თანამოაზრეების გადაწყვეტილებას პასუხი 20 იანვრის ყრილობაზე გაეცემა.