06, თებერვალი 2017 11:23:00
იპოთეკური სესხით დაზარალებული ანზორ ხუნდაძის სასამართლო 15 თებერვლამდე გადაიდო. სხდომის გადადების შუამდგომლობა დაცვის მხარის ადვოკატმა საქმის გაცნობის მოტივით დააყენა. ანზორ ხუნდაძეს პროკურატურა სხვისი ქონების თვითნებურად დაუფლებას ედავება. აღნიშნული საქმის გამოძება სისხლის სამართლის 160- ე მუხლით მიმდინარეობს , რაც ერთიდან სამ წლამდე თავისუფლების აღკვეთას გულისხმობს. ხუნდაძე იპოთეკით დატვირთული კუთვნილი სახლიდან 2015 წელს, ვალის გადაუხდელობის გამო გამოასახლეს. უსახლკაროდ დარჩენილმა საკუთარი ავეჯის ნაწილი ძველ სახლში ახალი მეპატრონის ნებართვის გარეშე შეიტანა. სხდომის დაწყებამდე იპოთეკური სესხით დაზარალებული მოსახლეობა სასამართლოსთან ანზორ ხუნდაძის მხარდასაჭერად შეიკრიბა. უფლებადამცველმა თამაზ ბაკურიძემ ხელისუფლებისგან გრძელვადიანი და დაბალპროცენტიანი სესხების გამოყოფა მოითხოვა.