06, თებერვალი 2017 08:26:00
აიპი „შუახევის კულტურის ცენტრის“ დირექტორს ყოფილი თანამშრომელი სამსახურიდან უსამართლოდ გათავისუფლებაში ადანაშაულებს. რამაზ დავითაძე, რომელსაც ორი წელი მთავარი ქორეოგრაფის თანაშემწის პოზიცია ეკავა , ხოლო ბოლო სამი თვის განმავლობაში ანსამბლს ხელმძღვნელობდა, აცხადებს რომ ვახტანგ ბერიძემ იგი თანამდებობიდან უსაფუძვლოდ გაათვისუფლა და სანაცვლოდ გარდერობის მცველის პოზიცია შესთავაზა. დავითაძე სამსახურში სასურველ თანამდებობაზე აღდგენას მოითხოვს. პროტესტის ნიშნად, დღეს მან დირექტორს კაბინეტის კარი აუჭედა. ვახტანგ ბერიძის განმარტებით, რამაზ დავითაძე აღნიშნულ თანამდებობაზე სამთვიანი გამოსაცდელი ვადით იმყოფებოდა, ნაკისრ ვალდებულებას თავი ვერ გაართვა და შესაბამისად, ხელშეკრულებაც არ გაუგრძელა. დირექტორი იმასაც განმარტავს, რომ 2017 წლიდან ცენტრში ქორეოგრაფის თანაშემწის შტატი გაუქმდა, ამიტომაც მან რამაზ დავითაძეს გარდერობის მცველის თანამდებობა შესთავაზა, რაზეც უარი მიიღო.