22, თებერვალი 2017 17:30:00
დიდი რაოდენობით საბიუჯეტო თანხის მითვისების ფაქტი აჭარის ფინანსთა და ეკონომიკის სამინისტროში. მინისტრის, რამაზ ბოლქვაძის განცხადებით, უწყების მიერ დაფუძნებული შპს „ჰიგიენას“ ხელმძღვანელმა პირებმა, სამსახურეობრივი მდგომარეობის გამოყენებით, მართლსაწინააღმდეგოდ მიითვისეს კომპანიის ანგარიშზე არსებული, სახელმწიფო ბიუჯეტის კუთვნილი დიდი ოდენობით თანხა. სამართალდამცველების ცნობით შპს-ს დირექტორი მიმალვაშია. როგორც რამაზ ბოლქვაძე ამბობს, თანხა ქობულეთის მუნიციპალიტეტში თანამედროვე ნაგავსაყრელის მშენებლობის პროექტისთვის იყო გათვალისწინებული. ფაქტზე „ნაციონალურ მოძრაობაში“ პასუხისმგებლობას აჭარის მთავრობის თავმჯდომარეს აკისრებენ. ირაკლი ცეცხლაძე „ჰიგიენას“ 2014 წლიდან ხელმძღვანელობდა. გამოძიება სისხლის სამართლის კოდექსის 182-ე მუხლით მიმდინარეობს.