19, ივლისი 2018 20:05:00
ზაფხულის სეზონისა და ტურისტული ნაკადის ზრდასთან ერთად, ბათუმში 114 ადგილზე შინაგან საქმეთა სამინისტრომ 125 ზოგადი ხედვის კამერა სრული დატვირთვით აამოქმედა. თანამედროვე სტანდარტების შესაბამისად მოეწყო სასერვერო ინფრასტრუქტურა და პროგრამული უზრუნველყოფა. კამერები საგზაო მონაკვეთების გარდა, ტურისტულ ზონებშია განთავსებული, მათ შორის ძველ ბათუმში და ბულვარის ტერიტორიაზე. ავტო-საგზაო შემთხვევების შემცირების გარდა, როგორც შინაგან საქმეთა სამინისტროში განმარტეს, კამერები დანაშაულის წინააღმდეგ ბრძოლას, კრიმინალური შემთხვევების უმოკლეს ვადაში გახსნასა და ზოგადად უსაფრთხო გარემოს გაძლიერებას შეუწყობს ხელს.