18, სექტემბერი 2018 15:43:00
ქობულეთში, რუსთაველის ქუჩაზე საბჭოთა დროინდელი წარწერები ამ დრომდეა შემორჩენილი. აბრებზე წარწერები მხოლოდ რუსულ ენაზეა.
ქობულეთის მერიაში ირწმუნებიან, რომ უწყებამ წელს რამდენიმე პირს მითითება მისცა და წარწერები ჩამოახსნევინა, თუმცა პრობლემის სრულად აღმოფხვრა მაინც ვერ მოხერხდა. მირიან ქათამაძის განცხადებით, პირველ ეტაპზე მოხდება საჭიროებების განხილვა და მომდევნო წლის ბიუჯეტში, შესაბამისი თანხების გათვალსიწინება.
,,ვფიქრობთ, კერძო სექტორთან თანამშრომლობით, თანამედროვე სტილის ქუჩის დასახელების აბრები შეიქმნას და პირობას ვდებ, რომ ჩვენ ამ მიმართულებით აქტიურად ვიმუშავებთ“ - აცხადებს ქალაქის პირველი პირი.
2017 წელს აღნიშნულ თემაზე „მაცნეს“ გადამღებმა ჯგუფმა რეპორტაჟი მოამზადა, სადაც მაშინდელი გამგებლის მოადგილე ირაკლი ცეცხლაძე ამბობდა, რომ მუნიციპალიტეტის ყველა ქუჩაზე ახალი აბრები 2017 წელს დამონტაჟდებოდა. თუმცა დანაპირები დღემდე არ შესრულებულა.
მირიან ქათამაძეისთვის ყოფილი გამგებლის ყოფილი მოადგილის მიერ დადებული პირობა უცნობია. ,,არ ვიცი რატომ ვერ შესრულდა წინამორბედის დაპირება, თუმცა მე ვიცი ჩემი უფლებამოსილება და ამის შესაბამისად განვსაზღვრავ დროის მონაკვეთსაც“ - ამბობს ქათამაძე.