27, თებერვალი 2017 20:37:00
“ნაციონალური მოძრაობა” საბიუჯეტო თანხების არამიზნობრივ ხარჯვაზე საუბრობს. პარტიის წევრებმა დღეს სოფელ კვირიკეს საშუალო სკოლის რეაბილიტაციის შეჩერებული სამუშაოები გააპროტესტეს. ოპოზიციის მტკიცებით, სკოლის რეაბილიტაცია გასული წლის სექტემბერში უნდა დასრულებულიყო, თუმცა ამ დრომდე სკოლა ექსპლუატაციაში არ შესულა. ლელა ვერულიძის განცხადებით, ტენდერში გამარჯვებულმა კომპანიამ თანხის 86% 420 000 ლარი უკვე აითვისა, თუმცა შესრულებული სამუშაოები უხარისხოა. მისი მტკიცებით, ნაგებობა რთულ მდგომარეობაშია და ოთახები წყლით ივსება. „ ნაციონალური მოძრაობის“ წევრი მთავრობას და განათლების სამინისტროს კორუფციულ გარიგებებში სდებს ბრალს და საბიუჯეტო თანხების მკაცრი კონტროლისკენ მოუწოდებს. ბრალდებას უპასუხეს განათლების სამინისტროში. მირიან ქათამაძის თქმით სკოლის რეაბილიტაცია კომპანიის მიერ ვალდებულებების შეუსრულებლობის გამო გაჩერებულია. აღნიშნული კომპანია სამუშაოების დაუსრულებლობის გამო უკვე დაჯარიმდა და სამინისტრომ თანხის ნაწილი უკან დაიბრუნა. რაც შეეხება რეაბილიტაციას, ტენდერი მიმდინარე წელს გამოცხადდება და წლის ბოლომდე დასრულდება.