13, ნოემბერი 2018 20:05:00
უკიდურესად გაჭირვებული მოქალაქე, რომელსაც 60 ლარიანი სოციალური დახმარება მოუხსნეს. 77 წლის კაცის ერთადერთი იმედი მეზობლების დახმარებაა, რადგან 180 ლარიანი პენსიით მხოლოდ კომუნალური გადასახადების დაფარვას ახერხებს. სიღატაკის ზღვარს ქვემოთ მყოფი მარტოხელა ავარიულ სახლში ცხოვრობს. რატომ დაავიწყდა სახელმწიფოს ჯონი ჯიჯიეშვილი?
77 წლის მარტოხელა ფიქრობს, რომ სახელმწიფოსგანაც მივიწყებულია. ჯონი ჯიჯიეშვილს საარსებო მინიმუმი რამდენიმე თვის წინ შეუწყვიტეს, რომელიც 60 ლარს შეადგენდა. გვიყვება, რომ ამ თანხით ცხოვრება მცირედით უმსუბუქდებოდა.
სოციალური დახმარების შეწყვეტის შემდეგ თავს 180 ლარიანი პენსიით ირჩენს. თანხის ნაწილით კომუნალურ გადასახადებს ფარავს. მისი ყოველდღიური ულუფა მწირეა, ხშირ შემთხვევაში კი როგორც თავად ამბობს მშიერია. ზოგჯერ მეზობლები და ახლობლები ეხმარებიან, მაშინ, როცა ყველაზე მეტად უჭირს.
სიღატაკის ზღვარს ქვემოთ მყოფი მხატვარი დეიდის მიერ დატოვებულ ამ 30 კვადრატულ სახლში ცხოვრობს. ბარაკული ტიპის საცხოვრისი ავარიულია, რის გამოც ყოველი გაწვიმებისას ოთახებში წყალი ჩადის. მოხუცი დროის უმეტეს ნაწილს ხატვას უთმობს, ახლა მას სამუშაო მასალებიც არ აქვს. ნახატებში ძირითადად საკუთარ განვლილ ცხოვრებას ხედავ.
უკიდურესად გაჭირვებული მოქალაქის საკითხზე საუბარი სოციალური მომსახურების სააგენტოში არ ისურვეს. სააგენტოს აჭარის ფილიალის დირექტორი „TV 25“-ის ჟურნალისტის სატელეფონო ზარმა გააღიზიანა. თემურ ქარცივაძემ აგრესიულად გვიპასუხა და გვითხრა, რომ აღნიშნული პიროვნება იტყუება და საკითხზე კომენტარს არ გააკეთებს. რის საფუძველზე მოუხსნეს ჯონი ჯიჯიეშვილს სოციალური დახმარება? კითხვის სააგენტოს პრესცენტრს მივმართეთ, თუმცა დაპირების მიუხედავად პასუხი მაინც ვერ მივიღეთ.