04, მარტი 2019 20:04:00
დეფიციტური საქმიანობა, რომელსაც თანდათანობით სულ ცოტა მიმდევარი რჩება. ახლა გაგაცნობთ 46 წლის ტელევიზორების ხელოსანს, რომლისთვისაც საქმე უკვე სამსახურზე მეტია. 30 წელი ეკრანებთან და ხელსაწყოებთან-ჰობად ქცეული ბავშვობის ინტერესი, რომლითაც ახლა უკვე ნუკრი ვარშანიძე ოჯახს არჩენს.
ეს ნუკრი ვარშანიძეა. ამ სახელოსნოში თითქმის 30 წელია მუშაობს. მუშაობს დასვენების გარეშე, შაბათ-კვირის ჩათვლით, დღის განმავლობაში დაახლოებით 10 საათს. დრო დილის 9-დან საღმოს 6-მდე დაზიანებული დეტალების შეკეთებაში გადის. საქმე 46 წლის ხელოსანისთვის იმაზე საინტერესო და აზარტულია, ვიდრე წარმოგიდგენიათ.
ეს ე.წ ტესტერია- ძირითადი ხელსაწყო, რომლითაც დაზიანების ადგილს ეძებს. მიგნების პროცესი ხშირ შემთხვევაში რამდენიმე საათსაც შეიძლება გაგრძელდეს. ეს კი სარჩილავია, რითაც ნუკრი გაფუჭებულ დეტალებს ხსნის და ამაგრებს. მუშაობა დიდ სიფრთხილეს მოითხოვს.
სირთულე როგორც ყველა საქმიანობას, ტელევიზორების შეკეთებასაც ახლავს. პატარა დეტალების გამოცვლა დიდ ყურადღებას საჭიროებს. სხვა შემთხვევაში შესაძლოა სასურველი შედეგი ვერ მიიღოს. საქმეს დღემდე სიამოვნებით აკეთებს. სწორედ ამ სიძნელეებმა განაპირობა ის, რომ ნუკრი სახელოსნოს წლებია არ ტოვებს.
ჰყავს მუდმივი მომხმარებელი. თუმცა გული წყდება, რომ თანამედროვე ტექნოლოგიების ეპოქაში ტელევიზორების შემკეთებელთა რაოდენობამ იკლო.
საქმიანობამდე იყო ტელევიზორების შეკეთების უბრალო ინტერესი. მერე ჰობად იქცა. ამბობს, რომ სიცოცხლის ბოლო წუთამდე საქმიანობას არ უღალატებს. ვიდრე, ნუკრი ამ სახელოსნოში იქნება, თქვენს ეკრანებს მწყობრიდან გამოსვლის საშიშროება არ ემუქრება.