ნონა დიასამიძის ყოველი დილა წყლის მომარაგებით იწყება. ვედროებით წყალი დიასახლისს, დღის განმავლობაში, ეზოდან რამდენჯერმე ამოაქვს. წყალს, ტბეთის ქუჩაზე, თითქმის ყველა ოჯახში, ვედროებით ეზიდებიან. ვითარება წლებია არ იცვლება.
უწყვეტ წყალმომარაგებას, ტბეთის ქუჩაზე, გასული წლის სექტემბრისთვის ელოდებოდნენ. წყლის მრიცხველები 2016 წლის აპრილში დაამონტაჟეს. მოსახლეობას სასმელი წყალი შეუფერხებლად ექვს თვეში უნდა მიეღო. ადგილობრივები ამბობენ, რომ მერიას არც დაპირება შეუსრულებია და არც მოსახლეობის წერილებზე პასუხობს.
მერიაში გვარწმუნებენ, რომ უწყვეტ წყალმომარაგებაზე დაპირება არ გაუციათ, ხოლო რაც დაგეგმილი იყო - განხორციელდა. შეიცვალა წყლის მილები და დამონტაჟდა მრიცხველები. ხუთკილომეტრიანი წყალსადენი კი წელს მოეწყობა. უწყებას საპროექტო-სახარჯთაღრიცხვო დოკუმენტი უკვე მზად აქვს.
ტბეთის ქუჩაზე არც საკანალიზაციო სისტემაა გამართული. კუსტარული ჭა, ადგილობრივების თქმით, ყოველ კვირას ივსება და ფეკალური მასა ეზოებში მოედინება. ადგილობრივები ამბობენ, რომ მერია მათ წერილებს ამ შემთხვევაშიც რეაგირების გარეშე ტოვებს.
პრობლემური ოჯახები დღეს „ნაციონალურმა მოძრაობამ“ მოინახულა. პარტიის წევრებმა მერიას ეფექტური მუშაობისკენ მოუწოდეს.
აღმოჩნდა, რომ საკანალიზაციო სისტემის მოწყობა დასახლებაში დაგეგმილი საერთოდ არ იყო. მერიას მზად მხოლოდ კვლევა აქვს, რომელიც დონორების შეფასებას ელოდება, რის შემდეგაც პროექტი უნდა შედგეს და ღირებულება დაჯამდეს. რაც შეეხება უშუალოდ სამუშაოების დაწყებისა და დასრულების ვადებს, მერის მრჩეველი ინფრასტრუქტურის რეაბილიტაციის საკითხებში, ვერ საუბრობს.
ტბეთის ქუჩაზე მცხოვრებლები მერიას საბავშო ატრაქციონებსაც სთხოვენ.
2
s
s
s