24, სექტემბერი 2019 20:50:00
ყოფილი მერი საკანში რჩება. გიორგი ერმაკოვი მოსამართლემ გირაოთი არ გაათავისუფლა. საპატიმროში დარჩება არჩილ ვანაძეც- მიუხედავად იმისა, რომ ყოფილი მაღალჩინოსნების ადვოკატები 3 საათის განმავლობაში ცდილობდნენ დავით მამისეიშვილის გადარწმუნებას. პროცესს ჩემი კოლეგა, ნაზიბროლა ქობულაძე დაესწრო.
დავით მამისეიშვილმა საბიუჯეტო თანხების გაფლანგვაში ბრალდებული შვიდი მაღალჩინოსნიდან 4 სასამართლო დარბაზიდან გირაოს სანაცვლოდ გაათავისუფლა. მათ 40 და 60 დღის ვადაში 100 100 ათასი ლარის გადახდა დაეკისრათ. სასამართლო სხდომის დარბაზი დღეს ნუკრი ხინთიბიძემ, თენგიზ პეტრიძემ, ბაგრატ მანველიძემ და ბექა ხალვაშმა დატოვეს. ბათუმის ყოფილი მერი გიორგი ერმაკოვი და მერიის ყოფილი მაღალჩინოსნები ეგარსლან ლომაძე და არჩილ ვანაძე პატიმრობაში რჩებიან.
გირაოთი გათავისუფლებული პირები ამბობენ, რომ დანარჩენი ბრალდებულების საპატიმროში დატოვება უსამართლოა. ყველა მათგანს საბოლოოდ გამამართლებელი განაჩენის მოლოდინი აქვს. ,,ციხე ის ადგილია, სადაც ყველა ადამიანს უმძიმს ყოფნა, როცა იცი, რომ უდანაშაულო ხარ იქ გაძლება ორმაგად მძიმეა - აღნიშნა სასამართლოს სხდომაზე დღეს თენგიზ პეტრიძემ.
გირაოს შეფარდების თაობაზე დღეს სასამართლოში მსჯელობა 3 საათის განმავლობაში მიმდინარეობდა. სხდომაზე წარმოდგენილი იყო ბათუმის მერის ასევე, არასამთავრობო ორგანიზაციების შუამდგომლობა ბრალდებულების გათავისუფლების შესახებ. არჩილ ვანაძის ადვოკატმა კი ბრალდებულის შვილის ჯანმრთელობის ცნობა წარადგინა. მისი განმარტებით, ვანაძის მცირეწლოვან შვილს მძიმე ემოციური ფონი აღენიშნება და მედიკამენტოზურ მკურნალობას შედეგი არ აქვს. ადვოკატები სამი საათის განმავლობაში ამტკიცებდნენ, რომ ბრალდებულების მხრიდან მოწმეებზე ზეწოლის საფრთხე არ არსებობს.
ადვოკატები გამოძიების დასრულების შემდეგ გამამართლებელ განაჩენს ელოდებიან. მათი განცხადებით, ბრალდებულების საპატიმროში დატოვების რეალურ მიზეზს ბრალდების მხარე ვერ ადასტურებს. ადვოკატის კითხვაზე, იყო თუ არა თუნდაც ზარი განხორციელებული რომელიმე მოწმესთან, პროკურორმა უპასუხა, რომ მსგავს შემთხვევაში, სასამართლოს საქმის კურსში ჩააყენებდნენ.
მომდევნო სასამართლო პროცესი ბათუმის საქალაქო სასამართლოში 4 ოქტომბერს გაიმართება.