აჭარის საზოგადოებრივი მაუწყებლის მრჩევლებმა ჰონორარები გაიზარდეს. საკითხს მხარი საბჭოს სამმა წევრმა: თამილა დოლიძემ, სოსო სტურუამ და თამარ წილოსანმა დაუჭირეს. გიგა ჩხარტიშვილმა კი თავი შეიკავა. საბჭოს წევრები ხელფასების მომატებას ბიუჯეტის გაზრდით ხსნიან. რაში ვუხდით ბორდს სოლიდურ ანაზღაურებას და რა გააკეთეს ჰონორარის ზრდამდე მრჩევლებმა? ვნახოთ ხატია გოგრაჭაძის სიუჟეტი.
მესამე სექტორში ფიქრობენ, რომ აჭარის საზოგადოებრივი მაუწყებლის მრჩეველთა საბჭოს, ჯერ არაფერი გაუკეთებია ისეთი, რომ ხელფასები გაზრდოდათ. „თავისუფალ ჟურნალისტთა სახლში“ ნეგატიურად აფასებენ იმ ფაქტს, რომ ბორდის პირველივე გადაწყვეტილება ფინანსური კეთილდღეობის გაუმჯობესებაზე ზრუნვაა.
მრჩეველთა საბჭოს წევრი კი ამბობს, რომ დანიშვნიდან მოკლე ხანში, ბორდმა ძალიან ბევრი რამ გააკეთა და ამ საქმეების ჩამონათვალს აკეთებს. თამილა დოლიძისთვის ხელფასის ზრდასთან დაკავშირებული კრიტიკა მაუწყებლის თანამშრომლების ანაზღაურების ფონზე, გაუგებარია.
ასლან ჭანიძე ვარაუდობს, რომ ბორდის წევრები ამ პრაქტიკას შემდეგ წლებშიც გააგრძელებენ და არგუმენტი მომავალშიც ბიუჯეტის ზრდა იქნება. „თავისუფალ ჟურნალისტთა სახლის“ თავმჯდომარეს, მოქმედი მრჩევლების პირობებში, მაუწყებელში პოზიტიური ცვლილებების მოლოდინი არ აქვს.
შეეძლო თუ არა მრჩეველთა საბჭოს, გაზრდილი ბიუჯეტი, სხვა მიმართულებით განესაზღვრა? ბორდში ამტკიცებენ, რომ ეს გადაწყვეტილება კანონდარღვევა იქნებოდა. თამარ წილოსანისთვის დამოუკიდებლობის შენარჩუნება მაღალ ანაზღაურებაზე გადის.
აჭარის მაუწყებლის სხვა მრჩევლების პოზიციის მოსმენა ამ თემაზე დღეს ვერ შევძელით. „მაცნეს“ გადამღებ ჯგუფს სოსო სტურუა და გიგა ჩხარტიშვილი დაემალა.
მე აქვე გეტყვით, რომ მრჩეველთა საბჭოს თავმჯდომარის ანაზღაურება 3 450 ლარი გახდა, გიგა ჩხარტიშვილის მოადგილეს 3 400 ლარი ექნება, სხვა წევრებს კი, 3 330.
6
s
s
s