კიდევ ერთი საჯარო მოხელე დატოვებს თანამდებობას "TV 25"-ის სიუჟეტის შემდეგ - გადაწყვეტილებას ხულოს მერი რამდენიმე დღეში ოფიციალურად გაახმოვანებს. საქმე მუნიციპალიტეტის საბავშვო ბაღების გაერთიანების დირექტორს გურამ ხოზრევანიძე ეხება, რომელმაც შვილი იმ ორგანიზაციაში დაასაქმა, სადაც მუშაობს.
ვახტანგ ბერიძის თქმით, სამსახურეობრივი მოკვლევა უკვე დასრულებულია და გადაწყვეტილებაც მიღებულია. "ის ადამიანი იქ აღარ იმუშავებს, სადაც იყო დღემდე, ყველაფერს მალე გაიგებთ, მეტს ვერაფერს გეტყვით ამ ეტაპზე" - გვითხრა სატელეფონო საუბრისას მუნიციპალიტეტის პირველმა პირმა.
ცნობისთვის, ხულოს საბავშვო ბაღების გაერთიანების დირექტორმა შვილი ერთ-ერთ სააღმზრდელო დაწესებულებაში კონკურსის გარეშე დაასაქმა.გურამ ხოზრევანიძის შვილმა ნეპოტიზმის ფაქტი დაადასტურა და განაცხადა, რომ ვაკანსიის შესახებ მამისგან გაიგო. თამილა ხოზრევანიძის თქმით, მუნიციპალიტეტში ნეპოტიზმი სიახლე არ არის და ადამიანები თანამდებობაზე სწორედ ამ ნიშნით ხვდებიან.
სიუჟეტი არქივიდან
TV 25-ის მასალების გამოყენებისას წყაროს მითითება სავალდებულოა!