06, თებერვალი 2020 21:10:00
ბათუმის შემოვლითი გზის მშენებლობის ირგვლივ პროტესტი არ ცხრება. ამჯერად მახვილაურში, ავტობანის ქვეშ მცხოვრები ერთ-ერთი ოჯახი სახლის შემდეგ მიწის კომპენსირებას ითხოვს. სურმანიძეებს მიმდინარე სამუშაები პრობლემებს უქმნით. ეს კი იმაში გამოიხატება, რომ სასოფლო სამეურნეო დანიშნულების ნაკვეთზე კულტურების მოყვანასაც ვეღარ ახერხებენ, რადგან მიწა უნაყოფო გახდა.
ვახტანგ სურმანიძე ბათუმის შემოვლითი მაგისტრალის ქვეშ მოქცეულ სახლში ცხოვრობს. იგი იმ მიწის კომპენსაციის ითხოვს, რომელზეც ფიცრულია განთავსებული. ამბობს იმასაც, რომ მიწის ფართობის ნაწილი შემოსაზღვრული ტერიტორიის გარეთ დარჩა. იქ არსებული ღობე დაანგრიეს და ახლად აშენებულს უკვე ბზარები გაუჩნდა.
მახვილაურის დასახლების 39 ნომერში მცხოვრები ამბობს, რომ უამინდობისას ეზო წყლითა და ტალახით ივსება, რის გამოც ფეხით გადაადგილება ფაქტობრივად შეუძლებელია. ეს ყველაფერი კი ნარგავებს საფრთხეს უქმნის და მიწას უნაყოფოს ხდის.
სურმანიძე იმ დაპირებებს იხსენებს, რაც პროექტის განმახორციელებელი უწყებისგან მიიღო. სახლის კომპენსაციის მიღების შემდეგ, მიწის ნაკვეთის ანაზღაურებაც უნდა მიეღო, თუმცა ახლა მის მოთხოვნებს უარით პასუხობენ.
რეგიონული განვითარებისა და ინფრასტრუქტურის სამინისტროს განსახლების სამსახურის ხელმძღვანელი ამბობს, რომ იგი არა დაპირებების, არამედ კანონის შესაბამისად იქცევა. მისივე თქმით, აღნიშნულ ტერიტორიას შეისწავლის და სათანადო რეაგირებას მოახდენს.
ვახტანგ სურმანიძე ამბობს იმასაც, რომ საკუთარი უფლებების დაცვის მიზნით ყველაფერს გააკეთებს და შესაბამისს უწყებებს მიმართავს.