07, თებერვალი 2020 21:48:00
მოუწესრიგებელი შიდა ეზო ფერაძის ქუჩაზე. ბათუმში, ბარაკული ტიპის დასახლებაში უამინდობისას ტერიტორიაზე რეზინის ჩექმის გარეშე ვერ გადაადგილდებიან. აქ მცხოვრებლები, ანტისანიტარიაზეც საუბრობენ. როდის მოგვარდება არსებული პრობლემები? თეო ფუტკარაძის სიუჟეტიდან გაიგებთ.
კიდევ ერთი პრობლემური მისამართი, რომელიც დღეს ბათუმში, გადავიღეთ, ფერაძის ქუჩაა. აქ ბარაკული ტიპის დასახლებაა. ტერიტორიაზე მცხოვრებლები წლების წინ დაწყებული პრობლემის შესახებ საუბრობენ. მათი თქმით, უამინდობისას ეზოში რეზინის ჩექმის გარეშე ვერ გადაადგილდებიან.
ამ მისამართზე, მცხოვრებლები, ანტისანიტარიაზეც საუბრობენ. ამბობენ, რომ ტერიტორია მოუწესრიგებელი და დანაგვიანებულია, რის გამოც გაუსაძლისი სუნია. ადგილობრივთა თქმით, ტერიტორიაზე მომრავლებულია, მღრღნელები და მწერები.
ბათუმის მერიის ინფრასტრუქტურისა და კეთილმოწყობის სამსახურში გვითხრეს, რომ ტერიტორიაზე მიმდინარე მშენებლობის გამო, ხშირად მძიმე ტექნიკა მოძრაობს, რის შედეგადაც ბეტონის საფარი დაზიანდა. სულხან ევგენიძის თქმით, მშენებლობების დასრულების შემდეგ ტერიტორიის რეაბილიტაცია იგეგმება.
დაიწყება თუ არაა მიმდინარე წელს ფერაძის ქუჩის რეაბილიტაცია? კითხვაზე პასუხი მერიაში არ აქვთ.