03, მარტი 2020 21:13:00
კორონავირუსზე საუბრით გაიხნა დღე უმაღლესი საბჭოს საგაზაფხულო სესია. მინისტრის საათის ფარგლებში დეპუტატების წინაშე ზაალ მიქელაძე წარსდგა. ჯანდაცვის მინისტრმა ბოლო 3 წლის განმავლობაში განხორციელებული სამუშაოები შეაჯამა. სხდომას ბოიკოტი გამოუცხადა ოპოზიციამ.
უმაღლესი საბჭოს საგაზაფხულო სესია აჭარის ჯანდაცვის მინისტრის ანგარიშით გაიხსნა. ზაალ მიქელაძემ ბოლო სამი წლის განმავლობაში გაწეული სამუშაო შეაჯამა. მინისტრმა მოხსენება კორონავირუსთან დაკავშირებული საკითხებით დაიწყო.
პრეზენტაციის დასრულების შემდეგ ზაალ მიქელაძემ დეპუტატების შეკითხვებს უპასუხა. როდის აღიჭურვება ინვენტარით ბათუმის რესპუბლიკური საავადმყოფო, ან რა გეგმები აქვს მინისტრს ახალი ინფექციური საავადმყოფოს მშენებლობასთან დაკავშირებით და განიხილება თუ არა მისი გაერთიანება ტუბერკულოზის ცენტრთან - დასმულ შეკითხვებს შორის ეს ყველაზე მთავარი თემა იყო.
რა კრიტერიუმების მიხედვით გაიცემა ბინები ე.წ. „ოცნების ქალაქში“ მცხოვრებ ოჯახებზე - ეს მინისტრის მისამართით დასმული მორიგი შეკითხვა იყო.
შეკითხვის ავტორებს შორის ოპოზიციური ფლანგის დეპუტატები არ ყოფილან. ისინი დღევანდელ სესიას პროტესტის ნიშნად არ დასწრებიან.
საგაზაფხულო სესიის ფარგლებში უმაღლესი საბჭო ანგარიშებს მოისმენს აჭარის სოფლის მეურნეობის, განათლების და ფინანსთა და ეკონომიკის მინისტრებისგან. უკვე ივნისში კი წლის ანგარიშით აჭარის მთავრობის თავმჯდომარე, თორნიკე რიჟვაძე წარსდგება.