10, აპრილი 2020 21:18:00
სკოლის გარეშე დარჩენილი სპეციალური საგანმანათლებლო საჭიროების მქონე ბავშვები. ქვეყანაში არსებულმა პანდემიამ სირთულეები მათ ცხოვრებაშიც შეიტანა. შეაფერხებს თუ არა სასწავლო პროცესის დისტანციურად ჩატარება სხვადასხვა უნარის გამომუშავებას? და როგორია ინდივიდუალური და ჯგუფური სწავლებები ონლაინ რეჟიმში? აღმოჩნდა, რომ ყველაზე რთული ბავშვების კომპიუტერთან გაჩერებაა.
რეზის ყოველი დილა ლოცვით იწყება. იგი სტიქაროსანია. ღვთისმსახურებებისთვის ბონის წმინდა ნიკოლოზის სახელობის ეკლსიაში დადის, თუმცა მას შემდეგ, რაც ქვეყანაში პანდემია დაიწყო და საგანგებო მდგომარეობა გამოცხდდა, გარეთ მხოლოდ, შაბათ-კვირის წირვებისთვის გადის.
შემდეგ ისევ სახლში ბრუნდება. რამდენიმე საგანში ონლაინ მიღებული დავალებები აქვს შესასრულებელი. რეზი ინკლუზიური სწავლების ცენტრის მოსწავლეა.
ონლაინ გაკვეთილი დათქმულ დროს იწყება. მასწავლებელი ყველა მოსწავლეს სათითაოდ ურეკავს.
ახლა ქართული ენისა და ლიტერატურის გაკვეთილია და მასწავლებელი მათ იგავს „მოხერხებული არაბს“ უკითხავს.
შემდეგ წაკითხულის გააზრება იწყება.
ბათუმის 26-ე საჯარო სკოლაში, იქ, სადაც რეზი სწავლობს, სულ სამი სპეც კლასია. სპეციალური საგანმანათლებლო საჭიროების მქონე მოსწავლეებისთვის აქ სახელოსნოებიც ფუნქციონირებს. თუმცა ონლაინ სწავლებისას თიხა და თექა სახატავებმა და ფერადმა ქარალდებმა ჩაანაცვლა.
გეგმით გაწერილ განვითარებას მათი შვილები რომ არ ჩამორჩებიან, დიდი იმედი აქვთ მშობლებსაც, თუმცა ონლაინ სწავლების პარალელურად დამდგარი ერთი ნეგატიური შედეგი უკვე თვალსაჩინოა. დედები ამბობენ, რომ ბავშვებს ყოველდღიური რეჟიმი დაერღვათ, ეს კი საკმაოდ რთული აღმოჩნდა.
სკოლის ფუნქციას რომ ონლაინ სწავლება ვერ შეცვლის, მითუფრო სპეციალური საგანმანათლებლო საჭიროების მქონე ბავშვებისთვის, ეს ფაქტია. ლალი ჯაფარიძე, რომელიც ინკლუზიური სწავლების ფსიქოლოგი და სპეც-მასწავლებელია, ამბობს, რომ ყველაზე რთული ბავშვების კომპიუტერთან გაჩერება აღმოჩნდა. ონლაინ რეჟიმში, გართულდა სხვადასხვა უნარების გამომუშავებისთვის მუშაობაც.
ვიდრე ქვეყანაში ონლაინ სწავლების რეჟიმი იქნება, სპეციალური საგანმანათლებლო საჭიროების მქონე ბავშვებისთვის, სკოლები იმ მოკლევადიან მიზნებზე იმუშავებენ, რომლებიც საგანგებოდ, სასწავლო გეგმის საფუძველზე შეიმუშავეს.