07, ოქტომბერი 2020 21:58:00
უკვე მეორე დღეა პანდემიის შედეგად უმუშევრად დარჩენილი მოქალაქეები ბათუმში, საპროტესტო აქციებს მართავენ. მტავრობის სახლის წინი ისინი საბანკო სესხების გადავადებას, ტრანსპორტის მოძრაობის აღდგენას და სოციალურ დახმარებას ითხოვენ. აღნიშნავენ, რომ კორონავირუსთან დაკავშირებული შეზღუდვების გამო შემოსავლის გარეშე დარჩნენ და ასე არსებობა შეუძლებელია. 7 ადამიანი შიმშილობს აჭარის მთავრობის სახლთან. პროტესტის უკიდურეს ფორმას მათ გუშინ ღამით მიმართეს.
უკვე მეორე დღეა, რაც აჭარაში, საპროტესტო აქციების ტალღა არ წყდება. მთავრობის სახლის წინ, უმუშევრად დარჩენილი თვითდასაქმებულები უცვლელი მოთხოვნებით კვლავ შეიკრიბნენ. სურთ, საბანკო ვალდებულებების გადავადება, სესხების გაყინვა, სატრანსპორტო საშუალებების აღდგენა. ასევე, ერთჯერადი 200 ლარიანი კომპენსაციის გაზრდა და გახანგრძლივება. ადმინისტრაციის შენობასთან 7 ადამიანი შიმშილობს.
თვითდასაქმებულებს, სკოლებსა და საბავშვო ბაღებში სასწავლო პროცესის აღდგენაც სურთ. სურთ ქირით მცხოვრები ადამიანების დახმარებაც.წინააღმდეგ შემთხვევაში საზღვრების გახსნას და პანდემიის გამო შეჩერებული სამუშაოების აღდგენას მოითხოვენ.
აქციაზე იმყოფებოდნენ მუსიკოსებიც, რომლებიც არსებული შეზღუდვების გამო, შემოსავლის გარეშე დარჩნენ. მათ რესტორნებზე დაწესებული რეგულაციის მოხსნა მოითხოვეს.
აქციის მონაწილეები აჭარის მთავრობის თავმჯდომარესთან შეხვედრას ღია ცის ქვეშ ითხოვდნენ, თუმცა თორნიკე რიჟვაძე შეკრებილებთან არ გამოვიდა. საბოლოოდ კი, თვითდასაქმებულებმა თავმჯდომარის შეთავაზება მიიღეს, ათკაციან ჯგუფებად დაიყვნენ და მთავრობის ადმინისტრაციაში შეხვედრაზე ეტაპობრივად შევიდნენ. შეხვედრა კონკრეტული შეთანხმების გარეშე დასრულდა.