კორუფციასა და ნეპოტიზმში მხილებული ბათუმის საჯარო ბიბლიოთეკის დირექტორი. ინგა გოგიბერიძემ, დანიშვნიდან მალევე სამსახურში მეუღლე დაასაქმა, თანაც კონკურისა და საჯარო ვაკანსიის გარეშე. კორუფციულ გარიგებებში მონაწილეობს ფინანსური განყოფილების უფროსთან ერთად. ამასთან, გოგიბერიძემ საავტორო წიგნი გამოსცა, თუმცა ინტერნეტში მოძიებული და კოპირებული მასალებით. ანუ საქმე პლაგიატთან გვაქვს და ეს კიდევ არაფერია. დირექტორს, ბიბლიოთეკის წიგნების ფონდის განადგურებაშიც ადანაშაულებენ. რა მიზეზებით იმართლებს თავს არაერთი ბრალდების ადრესატი? სულხან მესხიძე გიამბობთ.
ასე პასუხობს ინგა გოგიბერიძე თანამშრომელთა ნაწილს, რომელიც თვლის, რომ იგი ნეპოტიზმსა და კორუფციაშია მხილებული. ბათუმის საჯარო ბიბლიოთეკის დირექტორმა დანიშვნიდან მალევე სამსახურში მეუღლე კონკურისა და საჯარო ვაკანსიის გარეშე აიყვანა. გოგიბერიძის ქმარი დაწესებულების უსაფრთხოებაზე იყო პასუხისმგებელი.
გარდა ამისა, TV25-ს წყარო საჯარო ბიბლიოთეკიდან უყვება, რომ დირექტორი ფინანსური განყოფილების უფროსთან ერთად კორუფციულ გარიგებებში მონაწილეობს. ანონიმურ წერილში ვკითხულობთ, რომ შესყიდვების უმეტესობას მხოლოდ ორი პირი იგებს, რომელთა უკანაც ნათელა ცინცაძის ახლო სანათესაო დგას. მათთან ხელშეკრულებები პირდაპირი წესით ფორმდება.
ბრალდების ადრესატი ამ გარემოებას იმით ხსნის, რომ სუბიექტები, რომლებიც ორგანიზაციის მიერ გამოცხადებულ შესყიდვებში იმარჯვებენ მათთან სანდოობა აკავშირებთ. ვინაიდან შესყიდვების ღირებულება 500 000 ლარს არ აღემატება ხელშეკრულებები მიმწოდებელთან დირექტორის ერთპიროვნული გადაწყვეტილებით ფორმდება.
ბათუმის საჯარო ბიბლიოთეკის საფინანსო და სამეურნეო სამსახურის უფროსი მიმწოდებლებთან ნათესაურ კავშირს თავდაპირველად კატეგორიულად უარყოფდა, თუმცა ჩვენს მიერ წარდგენილი მტკიცებულებების შემდეგ ნათელა ცინცაძე დაიბნა. საჯარო რეესტრის ამონაწერის მიხედვით, ინდ მეწარმეებს: ზურაბ მოქიასა და ჯუმბერ ხუნდაძეს დოკუმენტებში ცინცაძის ელექტრონული ფოსტები აქვთ მითითებული.
თანამშრომლები, რომლებიც საჯაროდ ვერ საუბრობენ, წერილში იმასაც აღნიშნავენ, რომ ინგა გოგიბერიძემ მათ ინტერნეტში სხვადასხვა მასალების შეგროვება აიძულა. ბათუმის შესახებ გუგლსა და ვიკიპედიაში მოძიებული ცნობები კი საჯარო ბიბლიოთეკის დირექტორმა წიგნად გამოსცა, მასალის უდიდესი ნაწილი კი პლაგიატია.
ინგა გოგიბერიძე დირექტივას ადასტურებს და აცხადებს, რომ ინტერნეტში მასალების მოძიება თანამშრომლების ვალდებულებაა, თუმცა ბიბლიოთეკის დირექტორი აქვე კატეგორიულად უარყოფს, რომ საავტორო წიგნში შეტანილი მასალა პლაგიატია.
თანამშრომლები ინგა გოგიბერიძეს წიგნების ფონდის განადგურებაშიც ადანაშაულებენ. გვიყვებიან, რომ საცავი სავალალო მდგომარეობაშია, დირექტორი კი უნიკალური მასალების შენარჩუნების ნაცვლად პირად კომფორტსა და გამდიდრებაზე ზრუნავს.
ამ ბრალდებაზე დირექტორი თავს იმით იმართლებს, რომ წიგნები მას დაზიანებული დახვდა და ეს წინა დირექტორის მოღვაწეობის პერიოდში მოხდა.
ინგა გოგიბერიძე ბათუმის საჯარო ბიბლიოთეკის დირექტორად 2018 წლის სექტემებრში დაინიშნა. დაინტერესდება თუ არა საგამოძიებო ორგანო, მათ შორის ბათუმის მერია გოგიბერიძის საქმიანობით ამ ეტაპზე რთული სათქმელია. თანამშრომლებმა როგორც თავად ამბობენ ანონიმური წერილითა და მტკიცებულებებით სოციალური ქსელის მეშვეობით შესაბამის უწყებებს უკვე აცნობეს.