22, იანვარი 2021 21:59:00
ბათუმელებისთვის ერთ-ერთი ყველაზე მნიშვნელოვანი ადგილი კერძო კომპანიის საკუთრება ხდება. ქალაქის ისტორიულ ნაწილში მრავალფუნქციური კომპლექსის აშენება „ამბასადორი ბათუმს“ სურს. კომპანიამ, აქ 15-სართულიან მშენებლობაზე ნებართვის მოპოვება გასულ ანუ საარჩევნო წელს სცადა, თუმცა უარი უთხრეს. სამაგიეროდ, 2021 წელს, პირველივე სამუშაო კვირას, მან ბულვარში უკვე 16-სართულიანი სასტუმროს აშენების უფლება მოიპოვა. ტერიტორია კულტურული მემკვიდრეობის ძეგლია და 16-სართულიანი სასტუმროს აშენებაზე ნებართვა სწორედ მის დაცვაზე პასუხისმგებელმა ორგანიზაციამ გასცა. მშენებლობას თავის დროზე მმართველი გუნდის წევრებიც ეწინააღმდეგებოდნენ, თუმცა დავით ბაციკაძემ და აკაკი ძნელაძემ პოზიციები შეცვალეს.
მუქარის მიუხედავად, წლებმა აჩვენა, რომ დამნაშავეები ვერც ახალი მთავრობის პირობებში ისჯებიან, იმიტომ რომ ვისაც უნდა დაესაჯა, ახალა ისიც დამნაშავეების მხარესაა. ეს 2011 წელია, პერიოდი, როცა კულტურული მემკვიდრეობის ძეგლზე, ბათუმის ბულვარში, ხეები მოიჭრა და ე.წ. ტექნოლოგიური უნივირსიტეტის მშენებლობა დაიწყო. მას თან მასობრივი საპროტეტსო აქციები მოჰყვა. როგორც დღეს, პროტესტს ყურადღება არც მაშინ მიაქციეს და ახლა შენობაში სასტუმროა განთავსებული. ბევრს კარგად ემახსოვრება და მაინც, იმ საპროტეტსო აქციებზე, ლიდერებს შორის იყო აკაკი ძნელაძე და დავით ბაციკაძე. დღეს, უკვე საკანონმდებლო და აღმასრულებელ ხელისუფლებაში მყოფები, „ამბასადორ ბათუმი“-ის მშენებლობაზე არაფერს ამბობენ. მეტიც, 11 სართულის დაშენების იდეა აკაკი ძნელაძემ, ძეგლების საბჭოზე მოიწონა და მხარიც დაუჭრა.
ბროძლის სხვა მხარეს მხოლოდ მოქმედი ხელისუფლების პირები არ არიან. პოზიციები, ოპოზიციამაც შეცვალა. ახლა მოცემულობა ასეთია: ვისთვისაც გაუგებარი იყო რას ეწინააღმდეგებოდა ხალხი: უნივერსიტეტის მშენებლობას თუ განვითარებას, ახლა უკვირს, რატომ არ არის ღირებული, დღევანდელი პასუხისმგებელი პირებისთვის ქალაქის ისტორიული ნაწილის ხელუხლებლად შენარჩუნება.
აჭარის კულტურული მემკვიდრეობის დაცვის სააგენტომ, ძეგლების საბჭოს მხარდაჭრით, ოთხსართულიან შენობაზე „ამბასადორისთვის“ კიდევ 11 სართულის დაშენების ნებართვა გასცა. გარდა ამისა, შებობას სამი სართული მიწის ქვეშ დაემატება.
თავის დროზე „ამბასადორის“ პროექტი არც სააგენტოს ხელმძღვანელს, ზაურ ახვლედიანს მოსწონდა. 2019 წლიდან დღემდე გემოვნება რადიკალურად შეეცვალა. ამბობს, რომ პროექტი დახვეწილი სიმსუბუქის, ფერის და ვიზუალის იქნება, რომ იგი ბულვარის იერსახეს არა დაამახინჯებს და ვისაც გადაწყვეტილება არ მოსწონს, სასამართლოსკენ მიუთითებს.
ორგანიზაცია "ბათომმა" სამართლებრივი დავის დასაწყებად სამზადისი ზაურ ახვლედიანის მითითებამდეც დაიწყო. ჯერ-ჯერობით უცნობია, ვინ დაიცავს ორგანიზაციის და საზოგადოების დიდი ნაწილის ინტერესს სასამართლოში.