16, მარტი 2021 12:39:00
კობახიძის განცხადებები არაადეკვატურია - შთაბეჭდილება მრჩება, რაღაც დავალება აქვს მიღებული, რომ კრიტიკულ მომენტში ჩამშლელის როლი შეასრულოს, - ამის შესახებ „სტრატეგია აღმაშენებლის“ ერთ-ერთმა ლიდერმა განაცხადა.
მისივე თქმით, „ქართული ოცნების“ თავმჯდომარის განცხადებებს ჯერჯერობით ყურადღება არ უნდა დაეთმოს.
„ხანდახან შთაბეჭდილება მრჩება, რომ კობახიძეს მიზანმიმართულად უნდა მოლაპარაკებების ჩაშლა და ყოველ იმ მომენტში, როდესაც რაღაც შეთანხმების კონტურები გამოიხატება, გამოდის ეს ადამიანი და ჩამშლელ განცხადებებს აკეთებს. ისეთი შთაბეჭდილება მრჩება, რომ მას რაღაც დავალება აქვს მიღებული. ვფიქრობ, ჯერჯერობით ამ განცხადებებს ყურადღება არ უნდა მივაქციოთ. ჩვენი და დასავლელი პარტნიორების მიზანია, რომ პროცესი კონსტრუქციამდე მივიდეს. ამიტომ ამ პროცესს კონსტრუქციულად უნდა მივყვეთ და დავინახავთ „ქართულ ოცნებას“ მოლაპარაკება ნამდვილად უნდა თუ არა. ასევე, თუ ღირებული წინადადებები იქნა, თუ შეთანხმებისკენ გადადგმული ნაბიჯები იქნება, არა მარტო „სტრატეგია აღმაშენებელს“, არამედ სხვა პარტიებსაც შეთანხმება გვინდა, ოღონდ არა რაღაცის ხარჯზე", - განაცხადა ჩიხლაძემ