ბოლო 2 დღეა აქტიურად მიდის საუბარი იმაზე, რომ შესაძლოა აჭარის მთავრობის თავმჯდომარემ თანამდებობა დატოვოს. თორნიკე რიჟვაძის მოსალოდნელ წასვლასთან დაკავშირებით, ოპოზიცია ალაპარაკდა. შესაძლო საკადრო ცვლილებას, კატეგორიულად უარყოფს როგორც თავად რიჟვაძე, ისე ქვეყნის პრემიერ-მინისტრი, ირაკლი ღარიბაშვილი.
კითხვა მოსალოდნელი გადადგომის შესახებ თორნიკე რიჟვაძეს დღეს სასაცილოდ ეჩვენა. მთავრობის თავმჯდომარე მოკლე კომენტარით შემოიფარგლა. გვირჩია, რომ ჭორებს არ ავყვეთ. რიჟვაძემ არ დაადასტურა, რომ თანამდებობის დატოვებას აპირებს. მოგვიანებით კი განაცხადა, რომ ქვეყნისა და ხალხის სამსახურში დარჩენას უფლებამოსილების ვადის ამოწურვამდე გეგმავს.
თითქმის იგივე კონტექსტი იკითხებოდა პრემიერ-მინისტრის განცხადებაშიც. ირაკლი ღარიბაშვილს ვკითხეთ, რამდენად რეალურია ოპოზიციის მიერ გავრცელებული ინფორმაცია რიჟვაძის შესაძლო წასვლის შესახებ. მთავრობის მეთაურს ასევე დავუსვით კითხვა, ხომარ გაწირავს გუნდი აჭარის მთავრობის თავმჯდომარე იმის გამო, რომ იგი კალაძის ფრთაში მოიაზრება.
ღარიბაშვილი რიჟვაძის წარმატებით ამაყობს, სამაგიეროდ საპირისპიროს ამტკიცებს ოპოზიცია. „ერთიან ნაციონალურ მოძრაობაში“ თქვეს, რომ აჭარის მთავრობის თავმჯდომარე მოქმედი პრემიერის კადრებში არ მოიაზრება, რის გამოც მას სკამთან გამომშვიდობება მოუწევს. ნოდარ დუმბაძე დღეს იმასაც ამტკიცებდა, რომ თორნიკე რიჟვაძე გადადგომის შესახებ განცხადებას დღეს გააკეთებდა.
გადადგება თუ არა მთავრობის მოქმედი თავმჯდომარე- ამას დრო აჩვენებს. ისე, პოლიტიკურ წარსულს რომ გადავხედოთ, ბოლო რამდენიმე წლის განმავლობაში მსგავსი შინაარსის კომენტარები, როგორიც დღეს რიჟვაძემ გააკეთა, რამდენიმე ყოფილი მაღალჩინოსნის განცხადებების ანგარიშზე ირიცხება.
არქივი
5
s
s
s