26, მარტი 2021 21:45:00
არავისთვის უცხო არ არის, რამდენად დიდ რესურს ითხოვს უცხო ენის შესწავლა. ეს მარტივი და სასიამოვნო პროცესი ნამდვილად არ არის, თუმცა თანამედროვე ტექნოლოგიების ეპოქაში, ირგვლივ თუ მიმოვიხედათ, შევნიშნავთ, რომ ამას საკმაოდ მარტივად ახერხებენ პატარები. რამდენადაც კარგია ინგლისურის, ფრანგულის, გერმანულის თუ სხვა ენის ცოდნა, იმდენად საყურადღებოა მისი შესწავლის ასაკიც. ფსიქოლოგები ამბობენ, რომ ადრეულ ასაკში ენების დაუფლება ბავშვების განვითარებისთვის სასარგებლო არ არის. უარყოფით მხარეებზე საუბრობენ პედაგოგებიც.
დათვლა, ფერები, ცხოველები, რამდენიმე ენაზე, 4 წლის გიორგიმ, საბავშვო კლიპებით აითვისა. უცხოენოვან პროგრამებს, თავად, ირჩევს. ინგლისურად გამართულად მეტყველება უჭირს, თუმცა, თითქმის ყველა სიტყვას იგებს.
ის, რომ შვილი პატარაობიდანვე უცხო ენაზე მეტყველებს, მშობლებს მოსწონთ. კახა გორგაძის თქმით, ეს მხოლოდ ბავშვის სურვილით ხდება და ამაში მათი წვლილი უმნიშვნელოა.
ეკრანით, უცხო ენის ათვისება, სკოლამდელ თუ სასკოლო ასაკში საკმაოდ ფართოდ ფეხმოკიდებული და აპრობირებულია. ბაღის აღმზრდელის თქმით, ინტერნეტის გარდა, მშობლები გამიზნულად ეძებენ ისეთ ძიძებს, რომლებიც ბავშვებს უცხო ენაზე ესაუბრებიან. აღმზრდელები ფიქრობენ, რომ ამის გამო, პატარების გონება მუდმივად გადაღლილია. რაც შემდეგ, მათში გაღიზიანებას იწვევს.
„როდესაც, ბავშვი, სკოლაში უცხოური ენის გარკვეული ცოდნით მიდის, სასწავლო პროგრამასთან, მისი ცოდნის, დისბალანსი ხდება“, - ამბობს პედაგოგი ინგა წოწონავა. მისივე თქმით, ამის გამო, პატარებს სწავლის მოტივაცია ეკარგებათ. რასაც ისიც ემატება, რომ თანაკლასელთა ნაწილს თვითშეფასება უმცირდება. ასეთი მოსწავლეების საგაკვეთილო პროცესით დაინტერესებისთვის, მასწავლებლებს, დამატებითი მასალის შეთავაზება უწევთ.
ფსიქოლოგების აზრით, ასეთი, ბავშვების შემთხვევაში საყურადღებო ის ფაქტია, რამდენად გამართულად მეტყველებენ მშობლიურ ენაზე.
სპეციალისტების თქმით, ეკრანებიდან ნასწავლი უცხო ენის ცოდნას, ხშირად, მშობლიურ ენაზე საუბრისა და წერის სირთულეები ახლავს. მათივე განმარტებით ბავშვი, რომელიც, ენას ბუნებრივ გარემოში კომუნიკაციის გზით სწავლობს, უპირატეს მდგომარეობაშია, იმ თანატოლთან, რომელიც იმავეს, ეკრანიდან ითვისებს.
სპეციალისტების თქმით, ეკრანებით უცხო ენის შესწავლა, მშობლიურ ენაზე გამართული მეტყველების შეფერხებას იწვევს. თუმცა, იმ შემთხვევაში, თუ ხუთ წლამდე ბავშვი მშობლიურად გამართულად საუბრობს, ადრეულ ასაკში, დამატებით ენის შესწავლა, სირთულეებს ნაკლებად შექმნის.