სოფელ მახუნცეთის საჯარო სკოლის პედაგოგს, მშობელი, მოსწავლეზე ფიზიკურ ძალადობაში ადანაშაულებს. მისი მტკიცებით, პედაგოგმა, მოზარდს, თავში წიგნი ჩაარტყა. შესაძლო ძალადობის ფაქტს კატეგიორიულად გამორიცხავს ბრალდების ადრესატი. მომხდარზე გამოძიება შინაგან საქმეთა სამინისტრომ ძალადობის მუხლით უკვე დაიწყო. ნინია მესხიძემ მოისმინა მხარეთა პოზიციები და დეტალებს, მისი რეპორტაჟიდან გაიგებთ.
ერთ-ერთი მშობელი, რომელიც TV25-ს დაუკავშირდა, დალი ბარამიძეა. 13 წლის გოგოს დედა გვიყვება, რომ ფაქტი, გასულ კვირას მოხდა. მისი მტკიცებით, ქართული ენის პედაგოგმა, თავის შვილზე ფიზიკურად იძალადა. კერძოდ, მასწავლებელმა, მოზარდს, თავში წიგნი ჩაარტყა.
ფაქტის გაგების შემდეგ, დალი ბარამიძემ, სკოლის დირექტორს განცხადებით მიმართა. მისივე თქმით, შედეგად, პედაგოგი, გამოძიების დასრულებამდე, მე-8 კლასს ჩამოაშორეს. თუმცა, მასწავლებელმა, მოზარდებთან გაკვეთილის ჩატარება, დღეს, თვითნებურად სცადა. სწორედ ამიტომ, მშობელმა, შვილს საგაკვეთილო პროცესი დაატოვებინა.
მერვე კლასელის დედა, ფაქტს, პედაგოგთან წარსულში მომხდარ უთანხმოებას უკავშირებს. დალი ბარამიძის თქმით, მაშინ მახუნცეთის საჯარო სკოლის დირექტორის მოვალეობას ასრულდება, რა დროსაც, მასწავლებელს, მოზარდთა ბულინგის გამო, სასტიკი საყვედური გამოუცხადა.
ბრალდებას, რომ მოზარდებზე ფიზიკურად იძალადა, უარყოფს თავად ადრესატი. ლიანა გორგილაძე საპირისპიროს ამტკიცებს. პედაგოგმა, ბულინგში, სკოლა დაადანაშაულა. თქვა, რომ დაწესებულების დირექტორიც და თანამშრომლებიც, მას წლებია ავიწროებენ, რაზეც დუმს.
ძალადობაში ბრალდებულმა პედაგოგმა გაგვაფრთხილა, რომ ინფორმაციის გასაჯაროების შემთხვევაში, ბოდიშის მოხდა მოგვიწევდა.
შესაძლო ძალადობის ფაქტის შესწავლა სკოლის დისციპლინურმა კომიტეტმა უკვე დაიწყო. თავმჯდომარის განმარტებით, მსგავსი შემთხვევა აქამდე არ სმენია. თეონა შოთაძე განმარტავს, რომ გამოძიების დასრულების შემდეგ შესაბამისად იმოქმედებენ, თუმცა, რა სახის ღონისძიებას განახორციელებენ, დაკონკრეტება არ ისურვა.
მახუნცეთის სკოლის დირექტორის მოვალეობის შემსრულებელი ამბობს, რომ გარდა სკოლის დისციპლინური კომიტეტისა, ფაქტის მოსაკვლევად პოლიციასაც მიმართა. რაც შეეხება პედაგოგის ბრალდებას, რომ მას წლებია აბულინგებენ, თამარ ნაკაშიძე, კატეგორიულად უარყოფს.
მომხდარში, ქედის მუნიციპალიტეტის რესურსცენტრიც ჩაერთო. ხელმძღვანელის, დურმიშხან შავიშვილის თქმით, ფაქტის დადასტურების შემთხვევაში, სკოლა, უმკაცრეს რეაგირებას მოახდენს.
შესაძლო ძალადობის ფაქტზე გამოძიება შინაგან საქმეთა სამინისტრომაც დაიწყო. უწყების პრესსამსახურში გვითხრეს, რომ საქმეს, საქართველოს სისხლის სამართლის კოდექსის 126-ე, ძალადობის მუხლით იძიებენ.
2
s
s
s