24, სექტემბერი 2021 20:02:00
შუახევში მცხოვრებ წარჩინებულ სტუდენტებს, ადგილობრივი თვითმართველობა, სტიპენტიას დაუნიშნავს. შესაბამისი გადაწყვეტილება, მუნიციპალიტეტის საკრებულოს დღევანდელ სხდომაზე მიიღეს. კონკრეტულად ვის შეეძლება ფინანსური სარგებლის მიღება და კიდევ რა საკითხები განიხილეს დეპუტატებმა, ეკატერინე ბარამიძის სიუჟეტიდან გავიგებთ.
განკარგულების პროექტს, რომლითაც, აჭარის მთიან მუნიციპლიტეტში, 500 ლარიან ფინანსურ სარგებელს, ოთხი სტუდენტი მიიღებს, შუახევის საკრებულომ, დღეს, მხარი დაუჭირა. მერის მოვალეობის შემსრულებელი აცხადებს, რომ პროგრამის ბიუჯეტი პერიოდულად გაიზრდება. რუსუდან შავაძის თქმით, შესაბამისად, სტიპენდიის მიღების შესაძლებლობა, მაღალი აკადემიური მოსწრების მქონე, ბევრ სტუდენტს მიეცემა.
წარჩინებული სტუდენტებისთვის, სტიპენდიის დანიშვნის კანონპროექტის ავტორი, შუახევის საკრებულოს წევრი, ფატი ჭაღალიძეა. იდეის ავტორის თქმით, პროგრამის მთავრი მიზანი, აკადემიური დონის ზრდასთან ერთად, სტუდენტებითვის მოტივაციის ამაღლებაა.
აღნიშნული საკითხის გარდა, დღევანდელ სხდომაზე, დეპუტატებმა რესუსცენტრისგან, ეროვნული გამოცდების შედეგებსა და სკოლებში არსებული მდგომარეობის შესახებ ინფორმაცია მოისმინეს. კითხვები დაისვა, სოფლებში ინტერნეტის მიწოდებაში არსებულ პრობლემებზე. აღინიშნა ისიც, რომ დისტანციურ სწავლებაში პრობლემას, ინტერნეტი ქმნის. რესურსცენტრის უფროსის მოვალეობის შემსრულებლის განცხადებით, სოფელ ვანსა და ნაღვარევში, არაერთი მცდელობის მიუხედავად, პრობლემა ვერ მოგვარდა.
რაც შეეხება სტიპენდიას, რომელსაც ბაკალავრიატის საფეხურზე მყოფი სტუდენტები მიიღებენ, შუახევის მერია, სპეციალური კომისიის რეკომენდაციის საფუძველზე, მიმდინარე წლის პირველი და მეორე სემესტრების შედეგების საფუძველზე, 2022 წლის იანვრიდან გასცემს.