კორპუსის ჩამონგრევამდე ბრალდებულებმა კედლების მოძრაობა შენიშნეს, სცადეს გამაგრება, თუმცა შენობა დატოვეს - პროკურორი
საზოგადოება
ბათუმში, 26 მაისის ქუჩაზე, საცხოვრებელი სახლის ნგრევის ფაქტზე დაკავებული 3 პირის სასამართლო პროცესი დღეს მიმდინარეობს. პროკურორის, ალექსანდრე ძირკვაძის განცხადებით, კორპუსის ჩამონგრევამდე ბრალდებულებმა კედლების მოძრაობა შენიშნეს, სცადეს გამაგრეა, თუმცა შენობა დატოვეს. პროკურატურა სასამართლოსგან სამივე ბრალდებულის მიმართ აღკვეთის ღონისძიების სახით პატიმრობის შეფარდებას ითხოვს.
როგორც მან ჟურნალისტებს განუცხადა, ის ფაქტი, რომ მოცემულ სახლებში განხორციელდა ე.წ. საყრდენი კედლების დემონტაჟის სამუშაოები, დადასტურებულია მოწმეთა ჩვენებით და ბრალდებულთა გამოკითხვის ოქმებით.
„პროკურატურის სახელით, სამძიმარს ვუცხადებთ ბათუმში, კორპუსის სადარბაზოს ნგრევის შედეგად გარდაცვლილთა ოჯახის წევრებს, მათ ახლობლებს, სრულიად საქართველოს, ვწუხვართ ამ უმძიმესი ტრაგედიის გამო. რაც შეეხება სისხლის სამართლის საქმეს, შსს-ს მიერ ჩატარებული გამოძიებით დადგენილია, რომ 2021 ოქტომბრის დასაწყისში, ზ.ბ სათანადო ანაზღაურების სანაცვლოდ შეუთანხმდა ფიზიკურ პირებს, ხ.ს-ს და გ.ს-ს საცხოვრებელი კორპუსის პირველ სართულზე მის საკუთრებაში არსებულ საცხოვრებელ ფართებში სამშენებლო-სარეკონსტრუქციო სამუშაოების შესრულებაზე, რაც მოიცავდა როგორც არამზიდი, ასევე მზიდი კონსტრუქციების კედლების მოშლას. 4-8 ოქტომბრის დროის შუალედში ზ.ბ-სთან შეთანხმებით და მის მიერ ხელშეკრულების გარეშე დაქირავებულმა პირებმა ხ.ს-მ და გ.ს-მ სახელმწიფოსაგან ყოველგვარი ნებართვის გარეშე, თვითნებურად აწარმოეს სამშენებლო სამუშაოები, რაც მიმდინარეობდა სამშენებლო და საინჟინრო უსაფრთხოების წესების სრული დარღვევით. მათ მოშალეს როგორც არამზიდი, ასევე მზიდი კედლები. აღნიშნული სამუშაოები მიმდინარეობდა შესაბამისი საინჟინრო უსაფრთხოების მცოდნე ექსპერტებისა და სპეციალისტების მონაწილეობის გარეშე. აღნიშნულმა გამოიწვია საცხოვრებელი კორპუსის მდგრადობისა და სიმტკიცის რღვევა, რასაც შედეგად მოჰყვა 7-სართულიანი საცხოვრებელი კორპუსის ნგრევა. გარდაიცვალა 9 პირი და აღნიშნულ მისამართზე უძრავი და მოძრავი ქონება განადგურდა. ბრალდებულების მიმართ სისხლის სამართლებრივი დევნა დაწყებულია 240-ე მუხლის მეორე ნაწილით და პროკურატურა სასამართლოსგან მოითხოვს სამივე ბრალდებულის მიმართ აღკვეთის ღონისძიების სახით პატიმრობის გამოყენებას. პროკურატურა დაზარალებულ პირთა უფლებების და კანონიერი ინტერესების დასაცავად კანონმდებლობით გათვალისწინებულ ყველა ღონისძიებას მიმართავს და ექნება უმკაცრესი რეაგირება“, - განაცხადა პროკურორმა.
ალექსანდრე ძირკვაძის განცხადებით, აღნიშნულ სისხლის სამართლის საქმეზე დაწყებულია შესაბამისი ექსპერტზები.
5
s
s
s