გართულებული ეპიდვითარება, მძიმე შედეგებით გამოვლილი ოთხი ტალღა, მოსალოდნელი ტვინდემია და ჩავარდნილი იმუნიზაციის პროცესი - ასეთია ჩვენი ჯანდაცვაგანადგურებული ქვეყნის რეალობა დღეს. ეპიდემიოლოგები, ალერგოლოგ-იმუნოლოგები თუ პოლიტიკოსები - ყველა რეგულაციების დაცვისკენ მოგვიწოდებს. კორონავირუსზე ტესტირებისთვის სამედიცინო დაწესებულებებთან მოქალაქეების რიგები არ წყდება. ასეთ ადგილებზე ადამიანები დისტანციას, სამედიცინო პერსონალი კი, ელემენტარულ ჰიგიენის წესებს არ იცავს. მსგავსი პუნქტები, ხალხის მაღალი მობილიზაციის გამო, შესაძლოა, ინფიცირების ერთ-ერთ მთავარ წყაროდ იქცეს. რაც საბოლოოდ, ქვეყანას ძვირი უჯდება. მოქალაქეები ამბობენ, რომ კლინიკებთან გრძელ რიგებსა და დარღვეულ რეგულაციებს ხშირად ხედავენ.
უკვე მეორე წელი გადის, რაც ვირუსთან ერთად გვიწევს ცხოვრება. თუმცა, რამდენად ვისწავლეთ მასთან სწორად თანაცხოვრება, საკითხავია. საჭირო რეგულაციებს, მინიმუმ, სამედიცინო პერსონალი მაინც უნდა იცავდეს. იმ ფონზე, რასაც ახლა ჩვენი კადრებით ხედავთ, დღეში 5 ათასამდე ახალი დადასტურებული შემთხვევა აღარ უნდა გვიკვირდეს. ჯანდაცვის სფეროს სპეეციალისტები, ქვეყანაში მძიმე ეპიდემიოლოგიურ ვითარებას, სწორედ, გაუმართავ სისტემას ასახელებენ. მათი თქმით, მსგავსმა უპასუხისმგებლობებმა, შესაძლოა, მდგომარეობა კატასტროფამდე მიიყვანოს.
დაწესებულება, რომელიც მოქალაქეებს ვირუსისგან დაცვის მაგალითს უნდა აძლევდეს, წესებს თავად არღვევს და შესაძლო ინფიცირების მთავარი წყარო ხდება. არსებობს თუ არა რაიმე მაკონტროლიერებელი მექანიზმი, რითიც მოქალაქეებს შორის დისტანციის ზედამხედველობა და სამედიცინო პერსონალის შემოწმება განხორციელდება? კითხვით აჭარის ჯანდაცვის სამინისტროს მივმართეთ, სადაც განგვიცხადეს, რომ აღნიშნული თემა მათ არ ეხება. საბოლოო ჯამში პასუხი ვერცერთი უწყებისგან მივიღეთ. ხელისუფლება ხალხის ბედზე პასუხისმგებლობას ირიდებს, სამაგიეროდ, არჩევნების მეორე ტურისთვის, ამავე ხალხის იმედად, აქტიურად ემზადება.
4
s
s
s