09, იანვარი 2017 05:14:00
გრიპისა და გრიპისმაგვარი ინფექციური დაავადებების გახშირებული გართულებების გამო, აჭარაში პოლიკლინიკები მუშაობის საგანგებო რეჟიმზე გადავიდნენ. პირველადი ჯანდაცვის ცენტრების სპეციალისტები მოსახლეობას შაბათ-კვირის ჩათვლით, დილის 9 საათიდან გვიან ღამემდე მოემსახურებიან. გაზრდილია მედიკოსთა ჯგუფების რაოდენობაც. არის კიდევ ერთი სიახლე. კვალიფიციური მომსახურების მიზნით, ბრონქების დაავადების გართულების, ხველისა და ტემპერატურის შემთხვევებში, მოქალაქეებს სასწრაფო სამედიცინო დახმარების ბრიგადები აღარ მოემსახურებიან. ასეთ შემთხვევაში პაციენტებმა ოჯახის ექიმს ან პოლიკლინიკებს უნდა მიმართონ. შესაძლებელია მედიკოსთა ჯგუფის ბინაზე გამოძახებაც.