12, თებერვალი 2017 11:09:00
ეს ჯუმბერ ქემხაძეა, რომელიც ინასარიძის ქუჩაზე მდებარე პატარა ჯიხურში ვაჭრობს. ჩვენს ქალაქში მას თითქმის ყველა იცნობს. ბაბუ, რომელიც მტრედებს აპურებს. მოხუცი ფრინველებს მარცვლეულით და პურით დღეში რამდენჯერმე კვებავს.
76 წლის ბაბუს მტრედების სიყვარული ბავშვობიდან მოსდევს. გარკვეული პერიოდი ფრინველები სახლშიც ჰყავდა, ახლა ქუჩის მტრედების მოვლითაა დაკავებული. ჰობად ქცეული საქმიანობა 27 წლიან ისტორიას ითვლის. მას ტურისტებიც კარგად იცნობენ.
ხანდაზმულს კარგად იცნობენ სოციალური ქსელების მომხმარებლებიც. ფეისბუქში მისი არაერთი ფოტო გავრცელდა, რომლებსაც რეკორდული ნახვა და მოწონება აქვს. საკუთარ თავს ინტერნეტში ვერ ნახულობს, თუმცა იცის, რომ კეთილ საქმეს ყველა დადებითად აფასებს.
თუმცა ჯუმბერი ბაბუს ყველაზე მეტად მტრედები ცნობენ, რომლებიც ერთგულ მეგობარს ტრადიციულ ადგილას ყოველ დილით ელოდებიან.