15, მარტი 2017 20:04:00
„ერთიანი ნაციონალური მოძრაობის“ წევრი მიშა ბოლქვაძე ხელვაჩაურის მუნიციპალიტეტის გამგებელს საბიუჯეტო თანხების არამიზნობრივ ხარჯვაში ადანაშაულებს. საუბარია გამგებლის ავტომობილის ტექნიკური მომსახურების შესასყიდად გამგეობის მიერ გამოცხადებულ ტენდერზე, რომლისთვისაც "ნაციონალური მოძრაობის" წევრის განმარტებით, მუნიციპალიტეტი 91 963 ლარს ხარჯავს. ბოლქვაძე აღნიშნულს კორუფციული სქემის წინაპირობად აფასებს. ოპოზიციაში აცხადებენ, რომ ვაჭრობის შედეგად ტენდერში გამარჯვებულ შპს“თაზუს“ გამგეობამ 73 560 ლარის ღირებულების ხელშეკრულებას რამდენიმე დღეში გაუფორმებს. ხელვაჩაურის გამგებლის მოადგილე ოპონენტებს ტენდერის სწორად წაკითხვისკენ მოუწოდებს. მინდია ბასილაძის განმარტებით, ტენდერი არა 73 000 ლარზე, არამედ 7000 ლარზე გამოცხადდა. მესამე სექტორში განმარტავენ, რომ სახელმწიფო შესყიდვების კანონმდებლობით განსაზღვრულია ტენდერის პრეისკურანტის საშუალებით ჩატარება, რაც აღნიშნული ტენდერის თავისებურებას წარმოადგენს. ტიტე აროშიძე განმარტავს, რომ ხელშეკრულება აღნიშნულ შემთხვევაში პრეისკურანტის ხელშეკრულების მიხედვით 7000 ლარზე გაფორმდება.